اسلام آباد۔3ستمبر (اے پی پی) جنوبی پنجاب دے سیلاب متاثرہ علاقیاں اچ پاک فوج، سول انتظامیہ تے ݙوجھے اداریاں دیاں امدادی سرگرمیاں جاری ہن، دریائے ستلج دے نیڑے دے علاقیاں اچ پاک فوج اتے سول انتظامیہ دے 12 ریلیف کیمپ ٻݨائے ڳئن۔ بدھ کوں جاری تفصیلاں دے مطابق دریائے ستلج اچ گنڈا سنگھ والا تے حفاظتی بند ٹُٹ ڳئے، ہیڈ سلیمانکی تے بہوں وݙے درجے دا سیلاب اے، دریائے ستلج دے نیڑے دے علاقیاں اچ پاک فوج اتے سول انتظامیہ دے 12 ریلیف کیمپ ٻݨائے ڳئن، ساہیوال اچ 49 ڳوٹھ متاثر تھئے، پاک فوج اتے سول انتظامیہ دے 30 ریلیف کیمپ قائم ہن جݙاں جو تحصیل کبیروالا اچ ہیڈ سدھنائی تے بہوں وݙے درجے دا سیلاب اے، تلمبہ، میاں چنوں اتے اقبال نگر اچ ریلیف سرگرمیاں جاری ہن، ہزاراں لوک، مال مویشی اتے کنڑک محفوظ علاقیاں تے منتقل کیتی ڳئی اے۔ اوکاڑہ دے متاثرہ علاقیاں اچ پاک فوج ولوں مفت امداد کیتے میڈیکل کیمپس وی قائم کیتے ڳئے ہن، رنگ پور اتے ہیڈ محمد والا سودھے ممکنہ متاثرہ علاقیاں اچ وی فلڈ ریلیف کیمپ ٻݨائے ڳئن، تحصیل مظفرگڑھ اتے کوٹ ادو اچ پاک فوج اتے سول انتظامیہ ولوں حفاظتی اقدامات دا جائزہ ڳھدا ڳیا، ہیڈ محمد والا تے ممکنہ خطرے توں بروقت بچاؤ کیتے بریچنگ پوائنٹ اتے ݙوجھے حفاظتی اقدامات مکمل کر ڳھدے ڳئن۔
