اسلام آباد۔3ستمبر (اے پی پی) چیئرمین سینیٹ سید یوسف رضا گیلانی کوئٹہ اچ بلوچستان نیشنل پارٹی (بی این پی) دے جلسے تے تھیوݨ آلے خودکش حملے دی شدید مذمت کریندیں ہوئیں قیمتی انسانی جاناں دے ضیان تے ݙکھ تے افسوس کیتا۔ بدھ کوں سینیٹ سیکرٹریٹ توں جاری بیان دے مطابق چیئرمین سینیٹ آکھیا جو قومی یکجہتی اتے سیاسی سرگرمیاں دے دوران دہشت گردی دی کارروائیاں دے نتیجے اچ بے گناہ شہریاں دی جاناں ون٘ڄݨ بہوں افسوسناک اتے ناقابلِ برداشت اے۔ اے اصل اچ پاکستان اچ سیاسی تے جمہوری رواداری تے حملہ اے لیکن دہشت گرد عناصر آپݨے ناپاک عزماں اچ کامیاب نہ تھیسن۔ چیئرمین سینیٹ آکھیا جو 2 اتے 3 ستمبر 2025ء دی وچلی رات تھیوݨ آلے ایں خودکش حملے اچ بی این پی دے کارکناں سودھے کئی شہری جاں بحق اتے درجنیں زخمی تھئے جو پوری قوم کیتے دلی صدمے دا باعث اے۔ انہاں لواحقین نال دلی ہمدردی اتے تعزیت دا اظہار کریندیں ہوئیں مرحومین دے درجات دی بلندی اتے زخمیاں دی تیکھی صحت یابی کیتے دعا کیتی۔ چیئرمین سینیٹ ایں افسوسناک سانحے دے دوران سابق وزیراعلیٰ بلوچستان اتے بی این پی دے سربراہ سردار اختر مینگل دے قافلے کوں وی نشانہ بݨائے ون٘ڄݨ تے انہاں نال دلی ہمدردی تے تعزیت دا اظہار کیتا اتے آکھیا جو او ݙکھ دی ایں گھڑی اچ سردار اختر مینگل اتے انہاں دے سنگت دے نال کھڑے ہن۔ انہاں زخمیاں کوں فوری اتے بہترین طبی سہولتاں فراہم کرݨ دی ہدایت کیتی اتے آکھیا جو وفاقی تے صوبائی حکومتاں قانون نافذ کرݨ آلے اداریاں دے تعاون نال واقعے دی شفاف، جامع اتے بروقت تحقیقات یقینی بݨاون تاں جو ذمہ دار عناصر کوں قانون دے کٹہرے اچ گھن آیا ون٘ڄ سڳے۔ چیئرمین سینیٹ عوام توں اپیل کیتی جو ایں المناک سانحے کوں سیاسی فیدے یا نقصان دا ذریعہ نہ بݨݨ ݙیون بلکہ ملکی سلامتی اتے قانون دی حکمرانی کیتے اتحاد اتے یکجہتی دا مظاہرہ کرن۔ ڈپٹی چیئرمین سینیٹ، سیدال خان وی ایں المناک سانحے تے ݙکھ اتے افسوس دا اظہار کریندیں ہوئیں آکھیا جو او اوکھ دی ایں گھڑی اچ متاثرہ خانداناں اتے سردار اختر مینگل دے ݙکھ اچ برابر دے شریک ہن۔ انہاں مرحومین کیتے دعائے مغفرت اتے زخمیاں دی صحت یابی دی دعا کیتی۔
