بیجنگ۔3ستمبر (اے پی پی) وزیرِاعظم محمد شہباز شریف کوئٹہ اچ بلوچستان نیشنل پارٹی دے جلسے اچ دھماکے دی سخت لفظاں اچ مذمت کریندیں ہوئیں سیاسی جلسے تے حملے کوں بلوچستان اچ دہشت گرداں دی افراتفری کھنڈاوݨ دی گھناؤنی سازش دا منہ بولدا ثبوت قرار ݙتے۔ بدھ کوں ایں واقعے تے آپݨے ردعمل اچ وزیرِ اعظم دھماکے اچ قیمتی جاناں دے ضیان تے ݙکھ اتے افسوس کیتا اتے واقعے اچ زخمی تھیوݨ آلے لوکاں دی صحت یابی کیتے دعا کیتی، وزیرِ اعظم زخمیاں کوں بہترین طبی سہولتاں ݙیوݨ دی ہدایت کیتی۔ وزیراعظم آفس دے میڈیا ونگ توں جاری بیان دے مطابق وزیر اعظم دھماکے اچ ملوث لوکاں دی نشان دہی کر تے انہاں کوں سزا ݙیواوݨ دی ہدایت وی کیتی۔ انہاں آکھیا جو سیاسی جلسے تے حملہ بلوچستان اچ دہشت گرداں دی افراتفری کھنڈاوݨ دی گھناؤنی سازش دا منہ بولیندا ثبوت اے، دہشت گرد بلوچستان دے امن اتے ترقی دے ویری ہن۔ انہاں دہشت گردی دے عفریت دے مکمل خاتمے تئیں ایں دے خلاف جنگ جاری رکھݨ دے عزم دا اظہار کریندیں ہوئیں آکھیا جو معصوم تے نہتے شہریاں تے دہشت گرد حملے بزدلانہ فعل اتے مذمت دے لائق ہن۔
