ملتان۔ 03 ستمبر (اے پی پی) وزیراعلیٰ پنجاب مریم نواز شریف قاسم بیلہ ریلیف کیمپ دا دورہ کیتا، سیلاب توں متاثرہ ٻالاں اتے تریمتاں اچ رَل مِل ڳئیں ۔ انہاں ٻالاں اچ چاکلیٹ، بسکٹ، وردی پیک ون٘ڈے، ٻالاں کوں خود آپݨے ہتھاں نال جتی پوائی اتے تریمتاں کوں پوشاکاں اتے ݙوجھے تحفے پیش کیتے۔ او فلڈ ریلیف کیمپ اچ نکے ٻالاں دے وچال بہہ ڳئیں، ٻالاں نال گپ شپ کیتی اتے مختلف سوال پُچھے، ٻالاں توں حروف تہجی بارے پُچھیا، متاثرہ خانداناں توں مسئلیاں اتے ضرورتاں بارے وی پُچھیا۔ انہاں تریمتاں کوں گھراں دی بحالی کیتے اقدامات دا یقین ݙیوایا، ٹینٹاں اچ صفائی اتے ݙوجھے انتظامات تے اطمینان دا اظہار کیتا۔ وزیراعلیٰ مریم نواز قاسم بیلہ فلڈ ریلیف کیمپ اچ ہیلتھ، ریسکیو اتے ݙوجھے کاؤنٹرز دا وی جائزہ ڳھدا۔ کمشنر ملتان عامر کریم خان اتے ڈپٹی کمشنر وسیم سندھو وزیراعلیٰ پنجاب کوں انتظامات بارے ݙسایا۔ انہاں انتظامیہ کوں ٻالاں کیتے کھاوݨ، ترُشکی اتے ݙوجھی ضرورتاں پوری کرݨ دی ہدایت وی کیتی۔ مریم نواز شریف دوبارہ دورہ کرݨ دی یقین دہانی کریندیں ہوئیں نقصاناں دے ازالے دا وی وعدہ کیتا۔
