بیجنگ۔3ستمبر (اے پی پی) وزیراعظم محمد شہباز شریف نیشنل ڈیزاسٹر اینڈ مینجمنٹ اتھارٹی کوں دریاواں اچ ودھدی ہوئی طغیانی کوں سامݨے رکھ تے ریسکیو تے امدادی کارروائیاں کیتے پوری طرح تیار رہݨ دی ہدایت کیتی اے۔ وزیراعظم جو دورہ چین دے دوران بیجنگ اچ موجود ہن انہاں بدھ کوں بیجنگ توں چیئرمین این ڈی ایم اے نال ٹیلی فون تے رابطہ کر تے صورتحال معلوم کیتی۔ چیئرمین این ڈی ایم اے وزیراعظم کوں پاکستان اچ سیلابی صورتحال بارے ݙسیا اتے امدادی کارروائیاں تے بریفنگ ݙتی۔ وزیراعظم آفس دے میڈیا ونگ ولوں جاری بیان موجب چیئرمین این ڈی ایم اے راوی، چناب اتے ستلج اچ ودھدی ہوئی طغیانی بارے انہاں کوں ݙسیا۔ وزیراعظم این ڈی ایم اے کوں دریاواں اچ ودھدی ہوئی طغیانی کوں سامݨے رکھ تے ریسکیو تے امدادی کارروائیاں دی تیاری ویلھے توں پہلے مکمل کرݨ دی ہدایت کیتی۔ انہاں این ڈی ایم اے کوں صوبائی حکومتاں نال مکمل تعاون کر تے حفاظتی اقدامات اتے امدادی کارروائیاں تیکھی کرݨ دا حکم ݙتا۔ وزیراعظم راوی، چناب اتے ستلج اچ ودھدی ہوئی طغیانی دے حوالے نال عوام کوں پہلے توں آگاہ کرݨ دی ہدایت وی کیتی۔
