ملتان۔ 03 ستمبر (اے پی پی) چیئرمین سینیٹ یوسف رضا گیلانی آکھیا جو ملک دی اڄوکی سیلابی صورتحال اچ پوری قوم کوں یکجہتی دا مظاہرہ کریندیں ہوئیں متاثرین دی مدد کرݨی چاہیدی اے، اوکھے ویلھے اچ اساں کوں تنقید دے بجائے عوامی مفاد اتے ریلیف کیتے رَل مِل تے کم کرݨا چاہیدے۔ اے ڳالھیں انہاں بدھ کوں اتھاں جھوک وینس، وستی ریاض آباد اتے لک والا نواب پور دے علاقیاں اچ قائم فلڈ ریلیف کیمپاں دے دورے دے دوران میڈیا نال گالھ مہاڑ کریندیں ہوئیں کیتی۔ سید یوسف رضا گیلانی آکھیا جو اڄوکے سیلاب نال پورے ملک سودھے پنجاب اچ بہوں لوک متاثر تھئن، آپݨے گھراں کوں چھوڑݨ سوکھا نئیں ہوندا لیکن زندگی بچاوݨ کیتے اے ضروری اے جو سیلاب زدہ علاقیاں کوں فوری چھوڑ ݙتا ون٘ڄے، تاں جو انسانی جاناں کوں بچایا ون٘ڄ سڳے۔ سید یوسف رضا گیلانی آکھیا جو قومی یکجہتی کیتے ضروری اے جو مصیبت دی ایں گھڑی اچ سیلاب متاثرین دا اجتماعی طور تے ساتھ ݙتا ون٘ڄے، پوری قوم خاص طور تے مخیر حضرات کوں چاہیدے جو ݙکھ دی ایں گھڑی اچ گھر بار چھوڑݨ آلے لوکاں دی ہر طرح نال مدد کرن۔ چیئرمین سینیٹ آکھیا جو ملتان اتے نیڑے دے علاقیاں اچ سیلاب زدہ علاقیاں اچ مقامی لوک، سول سوسائٹی، انتظامیہ اتے ݙوجھے ادارے متاثرین دی مدد کیتے ہر ممکن کوشش کریندے پئن، میں خود مسلسل فلڈ ریلیف کیمپاں دا دورہ کریندا پیاں، سیلاب زدہ علاقیاں اچ چمڑی دی بیماریاں اتے نانگ وَڈھݨ دے واقعے سامݨے آندے پئن، ریلیف کیمپاں اچ ساری دوائیاں ودھ مقدار اچ موجود ہن جݙاں جو ڈاکٹرز وی ݙیوٹی سر انجام ݙیندے پئن۔ یوسف رضا گیلانی آکھیا جو جانوراں دے کھاوݨ کیتے چارہ وی مہیا کیتا ویندا پئے، سارے پاکستانیاں کوں یکجہتی دا مظاہرہ کریندیں ہوئیں متاثرین دی ودھ توں ودھ امداد کرݨی چاہیدی اے۔ انہاں آکھیا جو وزیراعلیٰ پنجاب مریم نواز شریف ملتان آئن اتے انہاں سیلاب متاثرہ علاقیاں دا دورہ کیتا، میݙے پُتراں وزیر اعلیٰ پنجاب کوں ریلیف کماں اتے سیلاب متاثرین دے مسئلیاں بارے ݙسایا، مریم نواز شریف ہر ممکن تعاون دی یقین ݙوائے۔ چیئرمین سینیٹ آکھیا جو اج دا ݙین٘ہ بہوں خطرناک اے، ٹیماں پاݨی مانیٹر کریندیاں پئن، سارے ادارے الرٹ ہن، جو لوک ہݨ تئیں دریا دے علاقیاں اچ ہن انہاں توں درخواست اے جو محفوظ ڄاہ تے منتقل تھی ون٘ڄن۔ انہاں آکھیا جو ٻئے ہک ہزار کیمپ میں منگوائن، اساں ٹیم ورک دے طور تے کم کریندے پئیوں، جنہاں بنداں کوں بریچ کرݨا اے میں انہاں دا دورہ کیتے، متعلقہ محکمے دا ایس او پی بݨیا ہوئے، جݙاں صورتحال پیدا تھیندی اے تاں او ایں دے مطابق بریچ کریندے۔ انہاں ٻیا آکھیا جو سیلاب دے بعد حکومت نقصاناں دا تخمینہ لیسی اتے ولا متاثرین دی مدد کیتی ویسی۔ ایں موقع تے ممبر قومی اسمبلی علی قاسم سودھے مقامی زمیندار تے سیاسی رہنما تے ݙوجھے وی سید یوسف رضا گیلانی دے نال ہن۔
