بیجنگ۔3ستمبر(اے پی پی)وزیراعظم محمد شہباز شریف ملک اچ چنڳا کاروباری ماحول ݙیوݨ اتے صنعتی شراکت داری کوں سوکھا بݨاوݨ دا عزم دوہریندے آکھیے جو صنعتی تعاون پاکستان اتے چین وچال اقتصادی تعاون اتے چین پاکستان اقتصادی راہداری دے ݙوجھے مرحلے اچ اعلیٰ معیار دی ترقی دا اہم ستون اے، خصوصی سرمایہ کاری سہولت کونسل سرمایہ کاری تیکھی کرݨ، رکاوٹاں کوں دور کرݨ اتے بزنس ٹو بزنس تعاون کوں مضبوط بݨاوݨ دا اہم پلیٹ فارم اے۔ انہاں اے ڳالھ چین اتے پاکستان وچال بزنس ٹو بزنس سرمایہ کاری کوں ودھارا ݙیوݨ کیتے اعلیٰ چینی کاروباری شخصیات نال ملݨ ویلھے آکھی۔ تیانجن اچ شنگھائی تعاون تنظیم دے سربراہ اجلاس اچ شرکت دے بعد وزیراعظم بیجنگ اچ چین دے سرکردہ کاروباری اداریاں دے سینئر ایگزیکٹوز نال اعلیٰ سطح ملاقاتاں کیتن جنہاں نال گالھ مہاڑ اچ ٹیکسٹائل، انفارمیشن ٹیکنالوجی، زراعت، صنعت، کان کنی اتے معدنیات، سڑک اتے ڈیجیٹل رابطے، ای کامرس اتے خلائی ٹیکنالوجیز سودھا ݙوجھے شعبیاں اچ تعاون کوں ودھاوݨ تے توجہ ݙتی ڳئی۔ ملاقاتاں اچ وزیراعظم پاکستان دی معیشت کوں پکا اتے مضبوط بݨاوݨ کیتے حکومت ولوں چاتے گئے جامع اصلاحاتی اقدامات دا ݙسایا جنہاں اچ سرمایہ کاراں کیتے ٹیکس مراعات، چینی شہریاں کیتے سوکھا ویزا پالیسیاں اتے سفر اتے کاروبار سانڳے وݙے ہوائی اڈیاں تے مخصوص بوتھ ٻݨاوݨ شامل اے۔ انہاں خصوصی سرمایہ کاری سہولت کونسل (ایس آئی ایف سی) دے ذریعے معاشی ترقی کیتے پاکستان دے عزم کوں ٻیا اڳونہا کیتے جیڑھا سرمایہ کاری کوں تیکھا کرݨ، رکاوٹاں کوں دور کرݨ اتے بزنس ٹو بزنس تعاون کوں مضبوط بݨاوݨ کیتے ہک اہم پلیٹ فارم اے۔ وزیراعظم آکھیے جو صنعتی تعاون پاکستان اتے چین دے اقتصادی تعاون دا بنیادی اتے چین پاکستان اقتصادی راہداری (سی پیک) دے ݙوجھے مرحلے اچ ایںدی اعلیٰ معیار دی ترقی دا ہک اہم ستون اے۔ انہاں چینی اداریاں کوں سݙا ݙتے جو خاص کر صنعتاں کوں خصوصی اقتصادی زونز اچ منتقل کرݨ کیتے او پاکستان کوں آپݨی ترجیحی سرمایہ کاری دی منزل سمجھن۔ انہاں آکھیا جو پاکستان ہنرمند اتے گھٹ لاگت افرادی قوت، صنعتی پیداوار اچ مسابقت کیتے ڳھٹ لاگت خام مال دی فراہمی اتے علاقائی اتے عالمی منڈیاں نال سٹریٹیجک رابطے دے نال ہک نویلا تقابلی فائدہ پیش کریندے۔ وزیراعظم چینی کاروباری شخصیات کوں یقین ݙیوایا جو پاکستان چنڳا کاروباری ماحول ݙیوݨ اتے صنعتی شراکت داری کوں سوکھا بݨاوݨ کیتے پرعزم اے، پاکستان دے خصوصی اقتصادی زونز اچ چینی سرمایہ کاری اچ وادھا نہ صرف پاکستان دی اقتصادی ترقی اتے روزگار دے موقع پیدا کرݨ اچ مددگار ثابت تھیسی ٻھل ایندے نال علاقائی ترقی، جدت اتے سانجھی خوشحالی دے محرک دے طور تے سی پیک دے وژن کوں وی طاقت ملسی
