ابوجا۔4ستمبر (اے پی پی) نائیجیریا دی وچلی ریاست نائیجر اچ ہک کشتی حادثے دے نتیجے اچ گھٹ توں گھٹ 60 لوک جاں بحق تھی ڳئے، جݙاں جو درجنیں کوں زندہ بچا ڳھدا ڳیا۔ شنہوا موجب اے گالھ مقامی حکام ݙسائی۔ بورگو مقامی حکومت دے چیئرمین عبداللہ بابا آرا آکھیا جو مسافراں نال بھری ہک ٻیڑی وݨ دے ہک تݨے نال ٹکرا تے الٹ ڳئی اتے کشتی حادثے اچ جاں بحق تھیوݨ آلے لوکاں دی تعداد 60 تھی ڳئی اے، اے تعداد ٻئی ودھ سڳدی اے۔ انہاں ݙسایا جو 10 لوکاں دی حالت تشویشناک اے، جݙاں جو کئی ہݨ وی لاپتہ ہن۔ نائیجر اسٹیٹ ایمرجنسی مینجمنٹ ایجنسی دے مطابق ریسکیو ٹیماں اتے مقامی غوطہ خور متاثرین دی تلاش اچ لگے ہوئن۔
