طورخم۔ 04 ستمبر (اے پی پی) وفاقی وزیر برائے سیفران اتے امور کشمیر و گلگت بلتستان انجینئر امیر مقام طورخم سرحد تے علاقائی یکجہتی اتے انسانی ہمدردی دے طور تے پاکستان ولوں افغان زلزلہ متاثرین کیتے امدادی سامان دی وݙی کھیپ افغان حکام دے حوالے کر ݙتی، وزیراعظم محمد شہباز شریف دی ہدایت تے امدادی پیکیج اچ ضروری غذائی شئیں، دوائیاں اتے ݙوجھی روزمرہ استعمال دی شئیں شامل ہن جو گزریے اتوار کوں افغانستان اچ آوݨ آلے شدید زلزلے دے متاثرین دی مدد کیتے فراہم کیتا ڳئن، ایں زلزلے بہوں وݙی تباہی مچائی جئیں اچ گھٹ توں گھٹ 1,469 لوک جاں بحق اتے 3,700 زخمی تھئے، زلزلے نال تقریباً 50 لکھ لوک متاثر تھئے۔ طورخم سرحد تے میڈیا نال گالھ مہاڑ کریندیں ہوئیں وفاقی وزیر انجینئر امیر مقام ݙکھ دی ایں گھڑی اچ پاکستانی عوام ولوں افغان عوام دے نال غیر متزلزل حمایت دا اعادہ کیتا۔ وفاقی وزیر انجینئر امیر مقام آکھیا جو پاکستان دی عوام اتے حکومت ݙکھ دی ایں گھڑی اچ آپݨے افغان بھراواں اتے بھیݨیں دے نال ہن، اے امدادی پیکیج زلزلے توں متاثرہ افغاناں کیتے اساݙی انسانی ہمدردی اتے یکجہتی دا ثبوت اے۔ انہاں آکھیا جو وزیراعظم محمد شہباز شریف افغانستان اچ قیمتی جاناں دے ضیان اتے املاک کوں پڄݨ آلے نقصان تے ݙکھ اتے تعزیت دا اظہار کیتے اتے نیڑے دے ملک کوں ہر ممکن مدد فراہم کرݨ دا عزم کیتے، ایں آفت دے فوری بعد نائب وزیراعظم اتے وزیر خارجہ محمد اسحاق ڈار وی آپݨے افغان ہم منصب نال رابطہ کر تے زلزلے دے بعد دی صورتحال نال نبڑݨ کیتے مسلسل تعاون دا یقین ݙیوایا۔ وفاقی وزیر انجینئر امیر مقام آکھیا جو پاکستان کوں وی قدرتی آفتاں دا سامݨا اے، ملک کوں اڄوکے سیلاباں توں وی کافی تباہی دا سامݨا کرݨا پئے، خاص طور تے خیبر پختونخوا، گلگت بلتستان، کشمیر اتے پنجاب اچ بہوں نقصان تھیے، انہاں آفتاں نہ صرف جاناں گھدیاں بلکہ اہم انفراسٹرکچر، مال مویشیاں، فصلاں اتے مواصلاتی نیٹ ورک کوں وی نقصان پڄایا۔ وفاقی وزیر انجینئر امیر مقام آکھیا جو آپݨے چیلنجاں دے باوجود پاکستان علاقائی انسانی امداد کیتے آپݨے عزم کوں برقرار رکھی پئے۔
