اسلام آباد۔4ستمبر (اے پی پی) صدر مملکت اتے پاکستان پیپلز پارٹی دے شریک چیئرمین آصف علی زرداری پی پی پی یو ایس اے دے صدر محمد خالد اعوان اتے انہاں دی ٹیم دی امریکا بھر اچ پارٹی کوں مضبوط بݨاوݨ کیتے پرخلوص کوششاں دی تعریف کیتی ۔ ایوان صدر دے پریس ونگ موجب خالد اعوان دے ناں خط اچ صدر مملکت آکھیا جو پی پی پی یو ایس اے اچ ہزاراں کارکناں دی شمولیت ہک قابل ذکر سنگ میل اے جو پارٹی کوں ٻاہرلے ملک مضبوط کرݨ دے انہاں دے عزم دی عکاسی کریندی اے۔ انہاں آکھیا جو ایں کامیابی نال ٻاہرلے ملک رہݨ آلے پاکستانیاں اچ جمہوریت، سماجی انصاف اتے عوامی خدمت دے پارٹی دے نظریات کوں نویں طاقت ملی اے اتے ایں دی سیاسی بصیرت اچ ودھارا تھیے۔ صدر مملکت پی پی پی یو ایس اے دے صدر دی خدمات دا اعتراف کریندیں ہوئیں آکھیا جو انہاں دی کوششاں پارٹی کوں مضبوط بݨاوݨ دے علاوہ پاکستان دے عوام اتے پاکستانی نژاد امریکی برادری وچال تعلقات کوں وی مضبوط کریندی پئن۔ انہاں ایں یقین دا اظہار کیتا جو پی پی پی یو ایس اے ایں جذبے اتے لگن دے نال پارٹی دے مشن اتے اقدار کوں اڳوں ودھاوݨ اچ اہم کردار ادا کریندی رہسی۔
