بیجنگ۔4ستمبر (اے پی پی) وزیراعظم محمد شہباز شریف چین۔پاکستان اقتصادی راہداری کوں پاکستان دی سماجی تے اقتصادی ترقی دا مرکزی ستون قرار ݙیندیں ہوئیں سی پیک فیز II دے حوالے نال مسلسل پیشرفت تے اطمینان دا اظہار کیتے۔ وزیراعظم آفس دے میڈیا ونگ توں جاری بیان موجب وزیراعظم محمد شہباز شریف نال چین دے وزیر صنعت تے انفارمیشن ٹیکنالوجی لی لیچینگ ملاقات کیتی۔ وزیراعظم چین دے نال صنعت، زراعت، تجارت، انفارمیشن اینڈ کمیونیکیشن ٹیکنالوجی، کان کنی اتے معدنیات دے شعبیاں اچ ݙو پاسہ تعاون کوں ودھاوݨ دے پاکستان دے وژن دا اعادہ کیتا۔ انہاں چین-پاکستان اقتصادی راہداری کوں پاکستان دی سماجی تے اقتصادی ترقی دا مرکزی ستون قرار ݙتا اتے سی پیک فیز II اچ مسلسل پیش رفت تے اطمینان دا اظہار کیتا۔ وزیراعظم دے اقتصادی اصلاحات دے ایجنڈے کوں سراہندیں ہوئیں چینی وزیر لی لیچینگ ایں گالھ تے زور ݙتا جو چین پاکستان کوں آپݨا گہرا دوست اتے سدا بہار تزویراتی شراکت دار سمجھدے۔ انہاں پاکستان دے نال ݙو پاسہ تعلقات کوں تعاون اتے شراکت دی نویں بلندیاں تئیں پڄاوݨ کیتے چین دے پکے عزم دا اظہار کیتا۔
