قائم مقام صدر مملکت سید یوسف رضا گیلانی نال ایوان صدر اچ ازبک سپیکر دی اہم ملاقات

اسلام آباد۔29ستمبر(اے پی پی)قائم مقام صدر مملکت سید یوسف رضا گیلانی نال ایوان صدر اچ ازبک سپیکر نورالدین مویدن خانویخ اسماعیلوف اہم ملاقات کیتی۔ ملاقات اچ ݙو طرفہ تعلقات، علاقائی روابط، اقتصادی تعاون اتے پارلیمانی رابطیاں دے ودھارے تے تفصیلی ڳالھ مہاڑ کیتی ڳئی۔ ملاقات اچ آکھیا ڳیا جو پاکستان اتے ازبکستان دے تعلقات تاریخی، ثقافتی اتے مذہبی بنیاداں تے کھڑن۔ قائم مقام صدر مملکت آکھیا جو او آئی سی وزرائے خارجہ دے 51ویں اجلاس دے موقع تے جون 2025ء اچ ݙوہائیں ملکاں وچال روڈ میپ تے دستخط کیتے ڳئے۔ سید یوسف رضا گیلانی ازبک صدر شوکت مرزیایوف کوں تیکھے اسلام آباد دے دورے دی دعوت ݙتی۔ ملاقات اچ ݙو طرفہ سیاسی مشاورت اتے مشترکہ وزارتی کمیشن ڄھیں میکنزم دے اجلاساں کوں خوش آئند قرار ݙتا ڳیا۔ سید یوسف رضا گیلانی آکھیا جو پارلیمانی وفد دے تبادلے اتے مشترکہ اجلاس ݙوہائیں پارلیماناں اچ بہتر سمجھ اتے تعلقات کوں ودھیسن، پاکستان اتے ازبکستان دی ݙو طرفہ تجارت 27 ملین ڈالر توں ودھ تے 111 ملین ڈالر تئیں پُڄ ڳئی اے، ݙوہائیں ملکاں دا ہدف آندے چار سال اچ ݙو طرفہ تجارت کوں 2 ارب ڈالر تئیں پُڄاوݨ ہے، ٹرانس افغان ریلوے منصوبہ پاکستان و ازبکستان کوں افغانستان دے ذریعے جوڑݨ دا اہم ذریعہ ہوسی، ریلوے منصوبے دی کامیاب تکمیل نال علاقائی روابط، تجارت اتے خوشحالی دے نویں دور دا آغاز ہوسی، پاکستان اتے ازبکستان سارے شعبیاں اچ فعال تعاون جاری رکھسن۔