وزیراعلیٰ دی ہدایت تے چھل آلے علاقیں دا سروے جاری اے ، پی ڈی ایم اے

لاہور۔ یکم اکتوبر(اے پی پی) صوبائی آفتاں کنٹرول کرݨ آلے اتھارٹی (پی ڈی ایم اے) وزیراعلیٰ مریم نواز شریف دی ہدایت تے چھل آلے علاقیں دا سروے شروع کیتے۔ پی ڈی ایم اے دے ترجمان موجب  چھل متاثرین وقتی سروے شروع کراوݨ تے وزیر اعلیٰ دا شکریہ ادا کیتے تے آکھیے جو مریم نواز شریف چھل پاروں تھیوݨ آلے ضیان دے ازالے بارے جیڑھے قدم چاتے او قابل ستائش ہن، اے او خدمت اے جیڑھی صرف مسلم لیگ (ن) دے قائد محمد نواز شریف دی دھی ہی کر سڳدی اے۔ ترجمان آکھیے جو صوبے دے چھل متاثرہ 27 ضلعیں وچ 1314 ٹیماں کم کریندیاں پئن، سروے ٹیماں 41735 چھل متاثرین دا ڈیٹا گھن ڳھدے۔ مختلف ضلعیں وچ 28632 کساناں کنوں چھل نال متاثر تھیوݨ آلی فصلاں دے ضیان دی تفصیل وی تیار کر ڳھدی اے ۔ سروے وچ 49510 ایکڑ چھل پاروں تھیوݨ آلی زمین دی نشاندہی، متاثر تھیوݨ آلے 12500 گھراں دے، جانور ونڄاوݨ آلے 603 مال داراں تے 2459 ہلاک تھیوݨ آلے جانوراں دا ڈیٹا وی گھن گھدے۔ انہاں آکھیے جو پی آئی ٹی بی پیلر تے نادرا توں تصدیق دے بعد متاثرہ لوکاں کوں مالی امداد ݙتی ویسی، چھل متاثرین کوں وزیراعلیٰ چھل ریلیف اے ٹی ایم کارڈ جاری تھیسن۔ ڈی جی پی ڈی ایم اے عرفان علی کاٹھیا دا آکھݨ اے جو سروے ٹمیاں دے نال چھل متاثرین دے بھرپور تعاون دا شکریہ ادا کریندوں