دہشت گرداں دے خلاف کامیاب آپریشنز قومی عزم تے سکیورٹی فورسز دی پیشہ ورانہ مہارت دا ثبوت ہن، چیئرمین سینیٹ

اسلام آباد۔27 ستمبر(اے پی پی) چیئرمین سینیٹ سید یوسف رضا گیلانی بلوچستان اچ دہشت گرداں دے خلاف کامیاب کارروائیاں تے سکیورٹی فورسز کوں خراجِ تحسین پیش کریندے آکھیے جو صوبے دے مختلف علاقیں اچ 71 توں ودھ دہشت گرداں کوں جہنم واصل کرݨ ہک وݙی کامیابی اے۔ سینیٹ سیکرٹریٹ توں جاری بیان اچ چیئرمین سینیٹ آکھیا جو دہشت گرداں دے خلاف مؤثر کارروائیاں سکیورٹی فورسز دی اعلیٰ پیشہ ورانہ صلاحیت، بہادری تے آپریشنل تیاری دی عکاس ہن جݙاں جو بلوچستان اچ دہشت گرداں دے ٻہوں سارے ٹھکاݨیں کوں کلیئر کرݨ امن و استحکام کیتے ہک اہم پیش رفت اے۔ سید یوسف رضا گیلانی آکھیا جو پاکستان اچ بدامنی کھنڈاوݨ آلے دہشت گرد عناصر تے انہاں دے سہولت کاراں دے خلاف کارروائیاں پوری قوت دے نال جاری رہݨیاں چاہیدن، غیرملکی سرپرستی تے معاونت نال تھیوݨ آلی دہشت گردی دا تدارک قومی سلامتی کیتے ناگزیر اے۔ انہاں آکھیا جو دہشت گردی دے خلاف جنگ اچ سکیورٹی فورسز بے مثال قربانیاں ݙتن تے قوم اپݨے شہداء تے غازیاں دیاں خدمات کوں ہمیشہ قدرواحترام دی نگاہ نال ݙیہدی رہسی۔ چیئرمین سینیٹ آکھیا جو پاکستان دی سلامتی، خودمختاری تے امن دے تحفظ کیتے سکیورٹی فورسز دا عزم پوری قوم کیتے حوصلے تے اعتماد دا باعث اے۔ انہاں کامیاب کارروائیاں اچ حصہ گھنݨ آلے سارے افسراں تے جواناں کوں خراجِ تحسین تے شہداء دیاں عظیم قربانیاں کوں سلام پیش کیتا۔