وزیرمملکت بلال اظہر کیانی دی یو اے ای دے صدر محمد بن زاید النہیان نال ملاقات

اسلام آباد۔ یکم اکتوبر(اے پی پی) وزیر مملکت خزانہ تے ریلویز بلال اظہر کیانی ابوظہبی وچ متحدہ عرب امارات دے صدر محمد بن زاید النہیان نال صدارتی محل قصر البحر وچ ملاقات کیتی جیندے وچ پاکستان تے یو اے ای وچال پراݨے تعلقات کوں مزید تکڑا کرݨ دا عزم کیتا ڳئے ۔ اعلامیہ موجب ملاقات دے دوران وزیر مملکت وزیراعظم محمد شہباز شریف دی طرفوں یو اے ای دی قیادت تے عوام کیتے نیک خواہشات تے خیرسگالی دا پیغام پُڄائے تے صدر محمد بن زاید النہیان کوں پاکستان دے دورے دی باضابطہ دعوت ݙتی۔ یو اے ای دے صدر جوابی خیرسگالی دے جذبات دا اظہار کریندے وزیراعظم تے پاکستانی عوام کیتے نیک خواہشات دا پیغام ݙتے۔ ملاقات وچ ݙو طرفہ تعلقات کوں مزید وسیع کرݨ، سانجھے تعاون دے ودھارے تے خطے وچ ترقی تے استحکام دے مشترکہ عزم تے زور ݙتا ڳیا۔ وزیرمملکت بلال اظہر کیانی وزیراعظم دی ہدایت تے ابوظہبی وچ جاری عالمی ریل ٹرانسپورٹ انفراسٹرکچر نمائش تے کانفرنس وچ وی شرکت کریندے پئن جیڑھی ابوظہبی نیشنل ایگزیبیشن سینٹر وچ اتحاد ریل دے زیر اہتمام تھیندی پئی اے۔