صحت دے شعبے وچ بہتری کیتے اصلاحات تھیندیاں پئن، وفاقی وزیر سید مصطفی کمال

اسلام آباد۔ یکم اکتوبر(اے پی پی) وفاقی وزیر قومی صحت سید مصطفی کمال آکھیے جو صحت دے شعبے وچ بہتری کیتے اصلاحات تھیندیاں پئین، پرے تے پسماندہ علاقیں وچ ٹیلی میڈیسن دے ذریعے طبی سہولتاں ݙیوݨ کیتے پرعزم ہیسے۔ اے ڳالھ انہاں ورلڈ بینک دی کنٹری ڈائریکٹر بلورما امگابازر نال ملاقات اچ آکھی ۔ انہاں آکھیے جو مریضاں دا طبی ڈیٹا محفوظ رکھݨ کیتے یونیورسل میڈیکل ریکارڈز کوں یقینی بݨیندے پیوں، پاکستان وچ 68 فیصد بیماریاں آلودہ پاݨی پاروں تھیندن۔ پاکستان دے صحت دے شعبے کوں درپیش چیلنجز تے انہاں دے پائیدار حل تے تفصیلی ڳالھ مہاڑ تھئی ۔ انہاں آکھیے جو صحت دے شعبے وچ ٻہوں سارے چیلنجز ہن، صاف پاݨی ݙیوݨ نال 68 فیصد بیماریاں کنوں بچیا ونڄ سڳدے جنہاں دا حل صاف پاݨی ݙیوݨ ، عوامی آگاہی تے مشترکہ کوششاں وچ پوشیدہ اے۔ انہاں آکھیا جو ایں سلسلے وچ قومی سطح تے مربوط حکمت عملی بݨائی ویندی پئی اے، وزارت صحت دا اصل کم لوکیں کوں بیمار تھیوݨ کنوں بچاوݨا اے، نہ جو صرف انہاں دا علاج کرݨا اے، اسپتالاں وچ مریضاں دا ٻوجھ ݙینھ و ݙینھ ودھدا پئے جے  اساں چاہندوں جو اسپتالاں دا رش گھٹ تھیوے تاں لوکیں کوں بیمار تھیوݨ کنوں بچاوݨاں ہوسی۔ انہاں آکھیا صحیح معنے وچ ہیلتھ کیئر سسٹم او ہوندے جیڑھا لوکیں کوں بیمار تھیوݨ کنوں بچاوے، وزارت صحت لوکیں کوں بیمار تھیوݨ کنوں بچاوݨ کیتے خصوصی اقدامات کوں یقینی بݨیندی پئی اے۔ ڈائریکٹر ورلڈ بینک آکھیے وزارت قومی صحت دی گزریل چھی مہینے دی کارکردگی قابل تحسین اے۔ انہاں آکھیا جو وزارت صحت دی چھی مہینے دی شاندار کارکردگی تے وزارت صحت دے جاری منصوبیں دی بھرپور تائید تے توثیق کریندوں۔ ملاقات وچ ایڈیشنل سیکرٹری ہیلتھ تے ڈی جی ہیلتھ وی موجود ہن