بی آئی ایس پی توں 6 کروڑ شہری فیدہ چیندے پئن، روبینہ خالد

اسلام آباد۔2اکتوبر (اے پی پی) بینظیر انکم سپورٹ پروگرام (BISP) دی چیئرپرسن سینیٹر روبینہ خالد آکھئے جو BISP توں ہک کروڑ خانداناں دی کفالت تھیندی پئی اے ، ہر خاندان وچ چھی لوک ہوندن ایویں چھی کروڑ شہری فیدہ چیندے پئن ۔ نشوونما پروگرام دے تحت 36 لکھ ماواں فیدہ چیندیاں پئن، ملک اچ ٻالڑیاں دی گروتھ سٹنٹنگ وچ 3.6 فیصد کمی آئی اے۔ اے ڳالھ انہاںBISP ہیڈکوارٹر وچ پریس کانفرنس کریندے آکھی ۔ روبینہ خالد آکھئے جو ایں پروگرام کوں حقارت دی نگاہ نال نہ ݙٹھا ونڄے، اے پروگرام ٻہوں سارے لوکاں کیتے زندگی دی امید اے۔ صحت مند ماء ہی صحت مند معاشرے دی بنیاد رکھ سڳدی اے۔ انہاں آکھئے جو 20 مہینے دی ٻالڑیاں دی سٹنٹنگ وچ 20 فیصد تئیں کمی واقع تھئی اے، کفالت پروگرام دے تحت ہک کروڑ 70 لکھ ٻال رجسٹرڈ ہن۔ انہاں آکھئے جو ایندے وچ اساݙا انتظامی خرچہ ہک فیصد اے، باقی پروگرام تے خرچ کریندے پیوں۔ روبینہ خالد آکھیا جو 216 ارب روپے ٻالڑیاں دی تعلیم تے اڄ تئیں خرچ کیتے ڳئن تے ایں پروگرام دے تحت 500 توں ودھ ٻالڑیاں میٹرک وچ A گریڈ حاصل کیتے۔ انہاں آکھئے جو امیر لوکاں کیتے بینظیر انکم سپورٹ پروگرام دی رقم کوئی مطلب کائنی رکھیندی پر غریب کیتے ٻہوں مطلب رکھیندی اے ، اے پروگرام بینظیر بھٹو دے وژن موجب اے ۔ انہاں دا وژن ہائی جو غریب طبقہ وی ایں ملک اچ سر چاتے جیوے ایں کیتے ایں پروگرام کیتے حقارت نہ پیدا کیتی ونڄے۔