قائم مقام صدر دا ساریاں جماعتاں کوں امن کیتے کم کرݨ دا مطالبہ

پشاور۔ 02 اکتوبر (اے پی پی) قائم مقام صدر سید یوسف رضا گیلانی آکھئے جو سارے صوبیں کوں این ایف سی ایوارڈ دے تحت فنڈز ݙتے ویندے پئن، ساریاں جماعتاں کوں رل تے امن و امان کیتے کم کرݨا چاہیدے، خیبرپختونخوا وچ پیپلز پارٹی کوں ولدا تکڑا کریسوں، ماضی وچ صدر آصف علی زرداری اختیارات پارلیمنٹ دے حوالے کیتے، کوئی جمہوری صدر ہی ایویں کر سڳدے۔ اے ڳالھ انہاں پشاور وچ گورنر خیبر پختونخوا فیصل کریم کنڈی دے رلے پریس کانفرنس نال خطاب کریندے آکھی ۔ قائم مقام صدر یوسف رضا گیلانی آکھئے جو سارے صوبیں کوں این ایف سی ایوارڈ دے تحت فنڈز ݙتے ویندے پئن۔ انہاں آکھئے جو امریکی صدر ڈونلڈ ٹرمپ نال پاکستان کلھے کائنی بلکہ سعودی عرب سودھے ڈوجھے ملکاں رل تے ڳالھ مہاڑ کیتی اے۔ سید یوسف رضا گیلانی آکھئے جو ساریاں جماعتاں کوں رل تے امن و امان کیتے کم کرݨا چاہیدے۔ انہاں آکھئے جو کل پاکستان پیپلز پارٹی تے مسلم لیگ (ن) دے رہنماواں وچال خوشگوار ماحول وچ ملاقات تھئی۔ انہاں آکھئے جو خیبر پختونخوا وچ پاکستان پیپلز پارٹی کوں ولدا تکڑا کریسوں۔ انہاں آکھئے جو صدر پاکستان آصف علی زرداری اختیارات پارلیمنٹ کوں منتقل کیتے، ایں کنوں پہلے صدر کنے اسمبلیاں کوں تحلیل کرݨ دا اختیار ہئی، ہک جمہوری صدر ہی ایویں کر سڳدے۔ انہاں آکھئے جو اساں رل تے ایں ملک کوں 1973 دا آئین ݙتا تے میثاق جمہوریت دی صورت وچ 1973 دا آئین بحال کیتے۔ پاکستان پیپلز پارٹی ایں ملک تے جمہوریت کیتے اپݨی قیادت دی قربانیاں ݙتن۔ انہاں آکھئے جو چیئرمین پاکستان پیپلز پارٹی بلاول بھٹو ٻاہرلے ملک پاکستان دے موقف کوں چنڳے طریقے نال پیش کیتے جیڑھا دنیا تسلیم کیتے جݙݨ جو ہندوستان دے موقف کوں تسلیم کائنی کیتا ڳیا۔ سید یوسف رضا گیلانی آکھئے جو سینٹ وچ قانون سازی مشاورت نال کیتی ویندی اے۔ نویں صوبیں دے حوالے نال ہک سوال دے جواب وچ انہاں آکھئے جو آئین وچ ایندے کیتے واضح طریقہ کار موجود اے