وفاقی وزیر احسن اقبال دا آزاد کشمیر دے احتجاج بارے بیان

اسلام آباد۔2اکتوبر (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھئے جو حکومت آزاد جموں و کشمیر وچ جاری احتجاج تے مسئلیں کوں مکالمے تے قانونی رستیں نال حل کرݨ کیتے پرعزم اے، امید اے جو سانجھے مکالمے دے ذریعے سارے مسئلے مثبت تے پرامن ماحول وچ حل تھی ونڄن۔ مظفرآباد روانگی کنوں پہلے میڈیا نال ڳالھ مہاڑ کریندے وفاقی وزیر آکھئے جو وزیراعظم محمد شہباز شریف دی طرفوں ہک اعلیٰ سطح دی کمیٹی بݨائی ڳئی اے جیڑھی زمینی صورتحال دا جائزہ گھنسے تے آزاد کشمیر وچ شراکت داراں نال ملاقاتاں کریسی۔ انہاں آکھئے جو اساں مظفرآباد دا اعلیٰ سطح دا دورہ کریندے پیوں تاں جو صورتحال دا نزدیک توں جائزہ ڳھدا ونڄ سڳے تے عوام نال براہ راست ڳالھ مہاڑ تھی سڳے، جتھاں وی قانونی حل ممکن ہوسی، حکومت عوام دے جائز مسئلیں دے حل وچ اپݨاں کردار ادا کرݨ کیتے پوری طرح تیار اے۔ وفاقی وزیر آزاد کشمیر دے محب وطن عوام دے جذبات کوں تسلیم کریندے علاقے وچ پرامن رہݨ تے تحمل دا مظاہرہ کرݨ دی اپیل کیتی۔ انہاں آکھئے جو خطے تے دنیا بھر دی موجودہ صورتحال ٻہوں حساس اے، کجھ قوتاں پاکستان وچ بدامنی دا فیدہ چا تے اپݨے مقاصد حاصل کرݨ چاہندیاں ہن، ایں کیتے اے ٻہوں ضروری اے جو اساں ایویں حالات پیدا نہ کروں جیڑھے ملک دے امن تے استحکام دے خلاف استعمال تھی سڳن۔ وفاقی وزیر یقین ݙیوائے جو وفاقی حکومت عوام دے مسئلیں تے خدشات توں پوری طرح باخبر اے تے انہاں کوں پرامن تے تعمیری انداز وچ حل کرݨ کیتے ہر ممکن اقدامات کیتے ویسن۔ انہاں آکھئے جو اساں آزاد کشمیر دے عوام دے جذبات دا احترام کریندوں تے انہاں کوں یقین ݙویندوں جو انہاں دے مسئلیں کوں نظراندازنہ کیتا ویسی ، اساݙی امید اے جو سانجھے مکالمے دے ذریعے سارے مسئلے مثبت تے پرامن ماحول وچ حل تھی ونڄن۔