محکمہ موسمیات دی سمندری طوفان “شکتی” پاروں ماہی گیراں کوں جِھکے سمندر وچ نہ ونڄݨ دی ہدایت

اسلام آباد۔5 اکتوبر (اے پی پی) پاکستان دے محکمہ موسمیات آکھیے جو سمندری طوفان “شکتی” شمال مغربی بحیرہ عرب وچ مغرب-جنوب مغرب آلے پاسے ٹرپئے ، محکمہ موسمیات موجب اے طوفان ایں ویلھے 21.0 ڈگری شمالی عرض البلد تے 61.8 ڈگری مشرقی طول البلد تے واقع اے، جیڑھا کراچی توں تقریباً 700 کلومیٹر جنوب مغرب وچ اے، طوفان اپݨے موجودہ مغرب-جنوب مغربی رخ تے 6 اکتوبر تئیں برقرار رہݨ دا امکان اے جیندے بعد اڳلے 24 گھنٹے وچ اے مغرب-وسطی تے شمال مشرقی بحیرہ عرب دے پاسے مُڑ تے بتدریج کمزور پئے ویسی، طوفان دے اثرات دے تحت سندھ تے بلوچستان دے ساحلی علاقیں وچ مقامی سطح تے ہلکا مینھ متوقع اے پر سمندر دی صورت حال خراب توں ٻہوں خراب رہسی تے سندھ دے ساحل دے نال 40 توں 50 کلومیٹر فی گھنٹہ دی رفتار نال ہوائیں چلسن، جیڑھیاں جھکڑ دی صورت وچ 55 کلومیٹر فی گھنٹہ تئیں ونڄ سڳدن ۔ محکمہ موسمیات ماہی گیراں کوں جِھکے سمندر وچ نہ ونڄݨ دی ہدایت کیتی اے کیوں جو طوفان دے مرکز دے آسے پاسے ہوا دی رفتار ݙوپہر تئیں 110 توں 120 کلومیٹر فی گھنٹہ جݙاں جو جھکڑ وچ 135 کلومیٹر فی گھنٹہ تئیں پڄ سڳدی اے ، ہوا دی شدت اڳلے 12 گھنٹے وچ گھٹ تے 80 توں 90 کلومیٹر فی گھنٹہ، تے جھکڑ وچ 100 کلومیٹر فی گھنٹہ رہݨ دی توقع اے جݙاں جو بعد وچ اے ٻئی گھٹ تے 50 توں 60 کلومیٹر فی گھنٹہ تے جھکڑ وچ 70 کلومیٹر فی گھنٹہ تھی ویسی۔ سمندر دی حالت اڳلے 36 گھنٹے دے دوران شمال مغربی تے مغرب-وسطی بحیرہ عرب وچ ٻہوں خراب رہسی، جݙاں جو 5 اکتوبر دی رات توں 7 اکتوبر تئیں سمندر وچ صورت حال ٻہوں زیادہ خراب تھیوݨ دا امکان اے۔ کراچی وچ قائم سائیکلون وارننگ سینٹر صورت حال تے مسلسل نظر رکھی ہوئی اے تے لوڑھ موجب تازہ ترین معلومات جاری کریندا پئے، ساحلی علاقیں وچ رہݨ آلےتے حکام کوں ہدایت کیتی ڳئی اے جو اوہ ہوشیار رہن تے محکمہ موسمیات دی ہدایات تے عمل کرن تاں جو حفاظت کوں یقینی بݨایا ونڃ سڳے۔