وفاقی وزیرداخلہ محسن نقوی دی صدارت اچ اجلاس

اسلام آباد۔5 اکتوبر(اے پی پی) وفاقی وزیر داخلہ محسن نقوی دی صدارت اچ سی ڈی اے ہیڈکوارٹرز وچ اجلاس تھیا۔ اجلاس وچ وزیر مملکت داخلہ طلال چوہدری تے سیکرٹری داخلہ محمد خرم آغا شرکت کیتی۔ اجلاس وچ اسلام آباد وچ جاری ترقیاتی منصوبیں تے پیش رفت دا تفصیلی جائزہ ڳھدا ڳیا۔ ایں موقع تے وزیراعظم دی ہدایت تے ایس سی او کانفرنس 2027 توں پہلے نویں کنونشن سنٹر دی تعمیر تے مشاورت کیتی ڳئی۔ اجلاس وچ جناح کنونشن دے نال ݙوجھا وݙا کنونشن ہال تعمیر کرݨ دا اصولی فیصلہ وی کیتا ڳئے۔ ایں موقع تے وفاقی وزیرداخلہ محسن نقوی ݙسیا جو نواں منصوبہ ٻہوں وݙے کانفرنس تے میٹنگ رومز سودھے وسیع کنونشن ہال تے مشتمل ہووݨا چاہیدے، نویں کنونشن ہال کوں بین الاقوامی معیار تے جدید دور دے تقاضیں موجب تیار کیتا ونڄے، منصوبے دی تکمیل توں پاکستان وچ وݙیاں بین الاقوامی کانفرنساں دے انعقاد وچ سوکھ تھیسی۔ وزیر داخلہ منصوبے دے ڈیزائن کیتے بین الاقوامی تے مقامی چنڳے آرکیٹیکٹس دیاں خدمات گھنݨ دی ہدایت کیتی تے اسلام آباد ایکسپریس وے دی کمرشلائزیشن دا جامع پلان گھنݨ دا حکم ݙتا، اجلاس وچ اسلام آباد وچ نویں پولیس تھاݨے تے پیش رفت دا جائزہ ڳھدا ڳیا، وزیر داخلہ محسن نقوی 6 تھاݨیں دے تعمیراتی کم 45 ݙینھ وچ مکمل کرݨ دا ٹاسک ݙتا۔ ایں موقع تے چیئرمین سی ڈی اے محمد علی رندھاوا وزیر داخلہ محسن نقوی کوں تفصیلی بریفنگ ݙتی۔ بریفنگ وچ ݙسیا ڳیا جو ٻئے 10 تھاݨیں دی عمارت دی تعمیر کیتے ٹینڈر جاری کر ݙتا ڳئے، پارلیمنٹ لاجز دے نویں بلاک دی تعمیر دا کم مقررہ مدت وچ مکمل کر ڳھدا ویسی، ٹی چوک فلائی اوور منصوبے کوں مکمل کر ڳھدا ڳئے، شاہین چوک دا سنگ بنیاد وقتی رکھیا ویسی، پاک سیکرٹریٹ دے آر بلاک دی عمارت دی بحالی تکمیل دے چھیکڑی مرحلے وچ اے۔ اجلاس وچ ڈپٹی کمشنر اسلام آباد، ارکان سی ڈی اے تے اعلیٰ افسراں وی شرکت کیتی۔