پاکستان اُبھردی معیشتاں وچ ݙوجھے نمبر تے ہے، بلوم برگ دی رپورٹ جاری

اسلام آباد۔5 اکتوبر (اے پی پی) بلوم برگ آکھیے جو پاکستان انہاں کجھ ملکاں اچ شامل اے جیندے دیوالیہ تھیوݨ دا ݙر گھٹ ڳئے تے پاکستان دی کارکردگی دنیا دی اُبھردی ہوئی معیشتاں وچ ݙوجھے نمبر تے اے۔ بلوم برگ دے تازہ اعداد و شمار موجب پاکستان انہاں کجھ ملکاں اچ شامل اے جیڑھے دیوالیہ تھیوݨ دے ݙر اچ ساریں توں وݙی کمی ݙکھائی اے ۔ پاکستان دی کارکردگی دنیا دیاں اُبھردیاں ہوئیاں معیشتاں وچ ݙوجھے نمبر تے رہی اے، صرف ترکیہ پاکستان توں اڳوں اے۔ گزریل 15 مہینے (جون 2024 توں ستمبر 2025 تئیں) پاکستان دے دیوالیہ تھیوݨ دے امکانات وچ 2200 پوائنٹس دی نمایاں بہتری آئی۔ اء پاکستان دی پائیدار معاشی بہتری دا ثبوت اے کیوں جو ملک او واحد معیشت اے جیڑھی ہرترائے مہینے وچ مسلسل بہتری ݙکھائی اے۔ ایندے برعکس جنوبی افریقہ، ایل سلواڈور تے ݙوجھے ملکاں اچ بہتری ٻہوں گھٹ رہی جݙاں جو مصر، نائیجیریا تے ارجنٹائن جیھے ملکاں اچ خطرے ٻئے ودھ ڳئن ۔ اے بہتری ایں ڳالھ دی علامت اے جو سرمایہ کاراں دا پاکستان تے اعتماد بحال تھیندا پئے۔ ایندے اہم عوامل وچ معاشی استحکام، ڈھانچہ جاتی اصلاحات، قرضیں دی وقتی ادائیگی، آئی ایم ایف پروگرام تے عملدرآمد تے بین الاقوامی ریٹنگ ایجنسیاں (ایس اینڈ پی، فج، موڈیز) دیاں مثبت درجہ بندیاں شامل ہن جیڑھے سرمایہ کاراں کیتے پیغام ہن جو پاکستان ہݨ دیوالیہ تھیوݨ دے ݙر توں نکل تے ھک مستحکم، پراعتماد تے اصلاحات تے ڳامزن ملک دے طور تے ابھردا پئے۔