وزیراعظم شہباز شریف دا پاکستانی معیشت بارے بلومبرگ دی رپورٹ دا خیر مقدم

اسلام آباد۔6اکتوبر (اے پی پی) وزیراعظم محمد شہباز شریف پاکستانی معیشت دے حوالے نال بلومبرگ دی اڄوکی مثبت رپورٹ دا خیر مقدم کریندیں ہوئیں آکھیا جو اے رپورٹ پاکستانی معیشت تے عالمی سرمایہ کاراں دے اعتماد اچ مسلسل وادھے کوں نشابر کریندی اے، ترقی دا اے پندھ ہݨ جاری راہسی۔ سنوار کوں وزیراعظم آفس دے میڈیا ونگ ولوں جاری بیان دے مطابق وزیراعظم آکھیا جو رپورٹ اچ ݙسیا ڳئے جو پاکستان دے کریڈٹ ڈیفالٹ سواپ (Credit Default Swap – CDS) اچ لُکی ہوئی ڈیفالٹ دے امکانات اچ 2200 بیسس پوائنٹس دی خاطر خواہ ڳھٹکی تھئی اے، پاکستان دے سی ڈی ایس دی قیمت اچ نمایاں کمی پاکستانی معیشت تے عالمی سرمایہ کاراں دے اعتماد اچ مستقل ودھارے کوں نشابر کریندی اے۔ وزیراعظم آکھیا جو عالمی درجہ بندی دے مطابق اُبھردی معیشتاں اچ ایں ویلھے ترکیہ دے بعد پاکستان ݙوجھے نمبر تے اے جو اساݙی معیشت کیتے چنڳی خبر اے۔ انہاں آکھیا جو گزریل حکومت دے آخر تے ملک ڈیفالٹ دے دہانے تے کھڑا ہا، بلومبرگ دی رپورٹ اساݙے کیتے ہک انتہائی اہم سنگ میل اتے اساݙی ترقی دے پندھ دی نشانی اے، حکومت پاکستان دی ودھ کوششاں اتے پاکستانی اتے عالمی کاروباری برادری دے تعاون نال پاکستان دی ترقی دا وعدہ پورا تھیندا ݙسدا پئے، ہݨ ترقی دا اے پندھ کݙاہیں نہ رُکسی۔