چیئرمین سینیٹ سید یوسف رضا گیلانی 68ویں دولتِ مشترکہ پارلیمانی کانفرنس اچ شرکت کیتے بارباڈوس پج ڳئے

بارباڈوس۔7اکتوبر (اے پی پی) چیئرمین سینیٹ سید یوسف رضا گیلانی 68ویں دولتِ مشترکہ پارلیمانی کانفرنس اچ شرکت کیتے بارباڈوس پج ڳئے۔ منگل کوں سینیٹ سیکرٹریٹ توں جاری بیان موجب سید یوسف رضا گیلانی برطانیہ اچ مختصر قیام دے بعد دولتِ مشترکہ پارلیمانی کانفرنس (سی پی سی 68) اچ شرکت کیتے بارباڈوس پج ڳئن۔ کانفرنس اچ دولتِ مشترکہ دے رکن ملکاں دے پارلیماناں دے سربراہان، ارکانِ پارلیمان اتے نمائندگان وݙی تعداد اچ شریک ہن۔ اے کانفرنس جمہوری اقدار، قانون دی حکمرانی، شفاف طرزِ حکمرانی، پارلیمانی تعاون اتے عوامی روابط دے فروغ دے حوالے نال اہم بین الاقوامی فورم دی حیثیت رکھیندی اے۔ چیئرمین سینیٹ کانفرنس اچ مختلف ملکاں دے پارلیمانی رہنماواں نال اہم ݙو پاسہ ملاقاتاں وی کریسن جنہاں اچ پارلیمانی سطح تے شراکت داری، عوامی روابط دے فروغ، خطے اچ امن تے استحکام، تجارتی تعاون اتے ماحولیاتی چیلنجاں جیڑھے موضوعات تے ڳالھ مہاڑ کیتی ویسی۔ سید یوسف رضا گیلانی کانفرنس دے ہک اہم سیشن دی صدارت وی کریسن۔ ایں موقع تے او موسمی تغیرات دے اثرات، پاکستان اچ اڄوکی بارشاں اتے سیلاباں توں پیدا تھیوݨ آلی انسانی تے ماحولیاتی صورتحال اتے قدرتی آفتاں نال نبڑݨ کیتے بین الاقوامی سطح تے مشترکہ اقدامات دی لوڑھ تے وی روشنی ݙیسن۔ انہاں ایں امید دا اظہار کیتا جو دولتِ مشترکہ پارلیمانی ایسوسی ایشن (سی پی اے) دے ہیٹھ تھیوݨ آلی اے کانفرنس رکن ملکاں وچال جمہوری اداریاں دے استحکام، قانون دی بالادستی، اتے عوامی فلاح و بہبود کیتے پارلیمانی تعاون کوں ٻیا مضبوط بݨاوݨ اچ اہم کردار ادا کریسی۔