سکیورٹی فورسز دی خیبر پختونخوا دے ضلع اورکزئی اچ خفیہ اطلاعات تے کارروائی، بھارتی حمایت یافتہ 19 خوارج ہلاک، فائرنگ دے تبادلے اچ لیفٹیننٹ کرنل اتے میجر سمیت 11 جوان شہید

راولپنڈی ۔8اکتوبر (اے پی پی) سکیورٹی فورسز خیبر پختونخوا دے ضلع اورکزئی اچ خفیہ اطلاعات تے مبنی کارروائی اچ بھارتی حمایت یافتہ 19 خوارج کوں ہلاک کر ݙتا پر فائرنگ دے تبادلے اچ لیفٹیننٹ کرنل اتے میجر سمیت 11 جوان شہید تھی ڳئے۔ بُدھ کوں پاک فوج دے شعبہ تعلقات عامہ (آئی ایس پی آر) موجب 7 اتے 8 اکتوبر 2025 دی وچلی رات سکیورٹی فورسز ضلع اورکزئی اچ بھارتی حمایت یافتہ فتنہ الخوارج دی موجودگی دی اطلاع تے خفیہ اطلاعات دی بنیاد تے آپریشن کیتا، آپریشن اچ سکیورٹی فورسز دی مؤثر اتے بروقت کارروائی نال 19 بھارتی حمایت یافتہ خوارج جہنم واصل تھئے پر شدید فائرنگ دے تبادلے اچ لیفٹیننٹ کرنل جنید عارف اتے انہاں دے نائب میجر طیب راحت بہادری نال دشمن دا مقابلہ کریندیں ہوئیں جامِ شہادت نوش کیتا۔ شہادت گھنݨ آلے لیفٹیننٹ کرنل جنید عارف راولپنڈی دے رہائشی ہن اتے انہاں دی عمر 39 سال ہئی جݙاں جو انہاں دے نائب میجر طیب راحت وی راولپنڈی دے رہائشی اتے انہاں دی عمر 33 سال ہئی۔ لیفٹیننٹ کرنل اتے میجر دے نال ٻئے 9 جانباز سپاہی وی وطن تے قربان تھی ڳئے، انہاں شہداء اچ نائب صوبیدار اعظم گل (خیبر)، نائیک عادل حسین (کرم)، نائیک گل امیر (ٹانک)، لانس نائیک شیر خان (مردان)، لانس نائیک طالش فراز (مانسہرہ)، لانس نائیک ارشاد حسین (کرم)، سپاہی طفیل خان (ملاکنڈ)، سپاہی عاقب علی (صوابی) اتے سپاہی محمد زاہد (ٹانک) شامل ہن۔ سکیورٹی فورسز ولوں علاقے اچ کلیئرنس اتے سینیٹائزیشن آپریشن جاری اے تاںجو کہیں وی لُکے ہوئے دہشت گرد کوں انجام تئیں پڄایا ونڄ سڳے۔ آئی ایس پی آر دے مطابق پاکستان دی سکیورٹی فورسز ملک توں بھارتی حمایت یافتہ دہشت گردی کوں ختم کرݨ کیتے پرعزم ہن اتے اساݙے بہادر جواناں دی اے قربانیاں اساݙے عزم کوں ٻیا مضبوط کریندن۔