وزیر داخلہ محسن نقوی دا اورکزئی اچ 19 بھارتی سپانسرڈ دہشت گرد ہلاک کرݨ تے سکیورٹی فورسز کوں خراج تحسین، شہداء کوں خراج عقیدت پیش کیتا

اسلام آباد۔8اکتوبر (اے پی پی) وفاقی وزیر داخلہ محسن نقوی اورکزئی اچ سکیورٹی فورسز دی کامیاب کارروائی اچ 19 بھارتی سپانسرڈ دہشت گرداں کوں جہنم واصل کرݨ تے فورسز دی ہمت تے بہادری دی تعریف کیتی اے۔ آپݨے بیان اچ انہاں مادرِ وطن دے دفاع اچ جامِ شہادت نوش کرݨ آلے لیفٹیننٹ کرنل جنید، میجر طیب اتے 9 جواناں کوں دلوں خراج عقیدت پیش کیتا۔ وزیر داخلہ آکھیا جو انہاں سپوتاں آپݨی قیمتی جاناں دا نذرانہ ݙے تے دہشت گرداں دے ناپاک ارادیاں کوں مٹی اچ ملا ݙتا۔ شہداء دیاں قربانیاں ناقابل فراموش ہن، قوم ہمیشہ انہاں دی قرضدار رہسی۔ محسن نقوی شہداء دے گھر آلیاں نال دلوں ہمدردی اتے اظہارِ تعزیت کریندیں ہوئیں آکھیا جو قوم انہاں دے ݙکھ اچ برابر دی شریک اے۔ انہاں دہشت گردی دے خلاف فورسز دے عزم کوں نہ ہلݨ آلا قرار ݙیندیں ہوئیں آکھیا جو شہداء دے خون دا ہک ہک قطرہ اساݙے عزم دی گواہی ݙیندے۔ وزیر داخلہ کارروائی اچ زخمی تھیوݨ آلے ݙو جواناں دی تیکھی صحت یابی کیتے دعا وی کیتی اتے آکھیا جو پوری قوم آپݨے انہاں بہادر سپوتاں اتے انہاں دے خانداناں کوں سلام پیش کریندی اے، جنہاں وطن کیتے وݙی قربانیاں ݙتن۔