پنجاب اچ بلدیاتی انتخابات سانڳے حلقہ بندیاں دا کم ݙو مہینے اچ پورا کیتا ونڄے، الیکشن کمیشن

اسلام آباد۔8اکتوبر(اے پی پی)الیکشن کمیشن پنجاب اچ موجودہ مقامی حکومتاں دے قانون 2022 اتے قواعد موجب دسمبر دے چھیکڑی ہفتے اچ بلدیاتی انتخابات کراوݨ دا فیصلہ سُݨا ݙتے۔ الیکشن کمیشن دے چیئرمین سکندر سلطان راجہ اتے ترائے رُکنی بینچ جیں اچ نثار احمد درانی، شاہ محمد جتوئی اتے بابر حسن بھروانہ شامل ہن دی طرفوں6 صفحیں تے مشتمل فیصلہ جاری کیتا ڳئے۔ ایں کیس دی سماعت 8 اکتوبر کوں تھئی ہئی۔کمیشن دی ولوں جاری کیتے ڳئے فیصلے موجب الیکشن کمیشن صوبائی حکومت کوں ہدایت کیتی اے جو او حلقہ بندیاں دا کم اڄ توں شروع کرے اتے 2 مہینے دے اندر پورا کرے تاں جو الیکشن دا شیڈول جاری کیتا ونڄ سڳے۔ کمیشن اعلان کیتے جو پنجاب اچ موجودہ بلدیاتی قانون 2022 موجب دسمبر 2025 دے چھیکڑی ہفتے اچ بلدیاتی انتخابات کرائے ویسن۔