سکیورٹی فورسز دی ڈیرہ اسماعیل خان اچ خفیہ اطلاعات تے مبنی کارروائی، 7 دہشت گرد جہنم واصل، میجر سبطین حیدر شہید

راولپنڈی۔9اکتوبر (اے پی پی) سکیورٹی فورسز ضلع ڈیرہ اسماعیل خان دے علاقے درابن اچ خفیہ اطلاعات تے مبنی کارروائی اچ بھارتی حمایت یافتہ 7 خوارج کوں جہنم واصل کر ݙتا اتے شدید فائرنگ دے تبادلے اچ میجر سبطین حیدر بہادری نال لڑدیں ہوئیں جام شہادت نوش کیتا۔ خمیس کوں آئی ایس پی آر توں جاری بیان موجب 8 اکتوبر کوں سکیورٹی فورسز بھارتی پراکسی فتنہ الخوارج نال تعلق رکھݨ آلے خوارج دی موجودگی دی اطلاع تے ضلع ڈیرہ اسماعیل خان دے علاقے درابن اچ انٹیلی جنس تے مبنی آپریشن کیتا۔ آپریشن اچ پاک فوج دے جواناں مؤثر کارروائی کر تے 7 بھارتی حمایت یافتہ خوارج کوں جہنم واصل کر ݙتا ڳیا پر شدید فائرنگ دے تبادلے اچ کوئٹہ توں تعلق رکھݨ آلے 30 سالہ میجر سبطین حیدر بہادری نال لڑدیں ہوئیں جام شہادت نوش کیتا۔ ماریے ڳئے خوارج توں اسلحہ اتے گولہ بارود وی برآمد تھیا۔ اے دہشت گرد سکیورٹی فورسز اتے قانون نافذ کرݨ آلے اداریاں دے خلاف دہشت گردی دی کئی کارروائیاں دے نال نال بے گناہ شہریاں دے قتل اچ وی سرگرم رہین۔ علاقے اچ کہیں وی بھارتی حمایت یافتہ خارجی دی موجودگی کوں ختم کرݨ کیتے سینی ٹائزیشن آپریشن کیتا ویندا پئے۔ آئی ایس پی آر آکھیا جو سکیورٹی فورسز ملک توں بھارتی اسپانسرڈ دہشت گردی دی لعنت کوں ختم کرݨ کیتے پرعزم ہن اتے اساݙے بہادر پُتراں دی ایہو سویں قربانیاں اساݙے عزم کوں ٻیا مضبوط کریندن۔