پاک سعودی تاجر برادری دا ݙو پاسے اقتصادی تعلقات کوں ودھارا ݙیوݨ دے عزم دا اظہار

کراچی۔ 10 اکتوبر(اے پی پی)سعودی عرب دے اعلیٰ سرمایہ کاری وفد، جیں دی قیادت شہزادہ منصور بن محمد آل سعود کیتی، پاکستان دیاں نمایاں ملٹی نیشنل اتے مقامی وݙیاں کمپنیاں دے سینئر نمائندگاں نال ملاقات کیتی۔ پاک سعودی تاجر برادری ݙو پاسے اقتصادی تعلقات کوں ودھارا ݙیوݨ دے عزم دا اظہار کیتا۔ اے ملاقات اوورسیز انویسٹرز چیمبر آف کامرس اینڈ انڈسٹری (او آئی سی سی آئی) اتے پاکستان بزنس کونسل (پی بی سی) دے زیرِ اہتمام او آئی سی سی آئی ہیڈ دفتر اچ تھئی۔ اجلاس اچ ݙوہیں بھرا ملکاں وچال اقتصادی تعاون کوں مضبوط بݨاوݨ اتے سرمایہ کاری و تجارت دے نویں موقع دی نشاندہی تے غور کیتا ڳیا۔وفاقی وزیرِ خزانہ محمد اورنگزیب ویڈیو لنک نال خطاب کریندے وفد دا خیرمقدم کیتا۔ انہاں آکھیا جو پاکستان دی معیشت ہݨ استحکام حاصل کر چُکی اے اتے لمبا عرصہ رہݨ آلے استحکام کیتے اصلاحات دے عمل توں گزردی پئی اے۔ پاکستان اتے سعودی عرب وچال شراکت داری ہک “نویں اسٹریٹجک مرحلے” اچ داخل تھی چُکی اے جیں کوں ہݨ گھاٹے اقتصادی تعاون اتے مشترکہ خوشحالی اچ بدلݨا ہوسی۔ شہزادہ منصور بن محمد سعد آل سعود سیشن توں خطاب کریندے پاکستان دے نال مملکت دے گھاٹے اتے سٹریٹجک تعلقات دی توثیق کیتی اتے ایں ڳالھ تے زور ݙتا جو ایں کوں ہݨ پائیدار اقتصادی رابطے اتے سانجھے طور تے فیدہ ݙیوݨ آلی سرمایہ کاری دے ذریعے مزید تکڑا کیتا ونڄݨا چاہیدے ۔ انہاں دورہ پاکستان دے ݙوجھے مرحلے کوں مثبت اتے تعمیری قرار ݙیندے آکھیا جو وزیراعلیٰ و گورنر سندھ اتے کاروباری و تجارتی نمائندگان نال ملاقاتاں معاشی تعاون کوں مزید ودھارا ݙیوݨ اتے مستقبل اچ سرمایہ کاری دا رستہ ہموار کیتے۔ وزیراعظم شہباز شریف دے اڄوکے دورہ سعودی عرب اتے مختلف شعبیں اچ کئی معاہدیں تے دستخط دا حوالہ ݙیندے انہاں آکھیا جو ایں دورے دے دوران اساں ݙو پاسے تجارتی اتے اقتصادی تعلقات کوں مزید تکڑا بݨاوݨ کیتے اڳوں ودھدے پیوں ۔ ݙوہیں ملکاں دے چنڳے مستقبل کیتے سانجھے تعلقات کوں تکڑا کرݨ دے وݙے امکانات تے زور ݙیندے شہزادہ منصور آکھیا جو اساں اتھاں صرف کاروبار کرݨ نی آئے بلکہ دوستی اتے بھرپی کوں ودھاوݨ سانڳے آیوں ۔ سعودی عرب اتے پاکستان دے عوام ہک ݙوجھے کیتے محبت دا جذبہ رکھیندن اتے سعودی عرب پاکستان اچ معاشی استحکام چاہندے، انہاں آکھیا جو انہاں معاہدیں نال دوستانہ تعلقات اتے برادرانہ تعلقات اچ ودھارا تھیسی۔او آئی سی سی آئی دے سیکرٹری جنرل ایم عبدالعلیم آکھیا جو او آئی سی سی آئی جو 200 توں ودھ ملٹی نیشنل کمپنیاں دی نمائندگی کریندے، پاکستان اچ ٻاہرلے سرمایہ کاراں اتے بدلدی ہوئی معیشت وچال ھک تکڑٖے پُل دا کردار ادا کریندا پئے۔ سعودی عرب دی ودھدی ہوئی دلچسپی پاکستان دے اصلاحاتی عمل اتے سرمایہ کاری دے امکانات تے عالمی اعتماد دی بحالی کوں ظاہر کریندی اے۔ پی بی سی دی چیئرپرسن ڈاکٹر زیلاف منیر وفد کوں بریفنگ ݙیندے ݙسایا جو پاکستان اچ اقتصادی ماحول بہتر تھیندا پئے، زرمبادلہ دی شرح مستحکم اے اتے کاروباری اعتماد اچ ودھارا تھیندا پئے ۔ انہاں آکھیا جو پاکستان دی معاشی بحالی تکھے تکڑی تھیندی پئی اے ، اتے سعودی سرمایہ کاری مستحکم ترقی، صنعتی توسیع اتے ٹیکنالوجی تے مبنی ترقی اچ کلیدی کردار ادا کر سڳدی اے۔ او آئی سی سی آئی دے صدر یوسف حسین آکھیا جو پاکستان اچ کاروباری فضا مثبت اے اتے ملک آپݨیاں برآمدات کوں ودھاوݨ اتے نویں منڈیاں تئیں رسائی حاصل کرݨ دی صلاحیت رکھیندے۔ انہاں آکھیا جو سعودی شراکت داراں دے نال مشترکہ منصوبیں اتے علاقائی ویلیو چینز دے ذریعے برآمدات تے مبنی ترقی اتے مشترکہ خوشحالی حاصل کیتی ونڄے۔ پی بی سی دے سی ای او جاوید قریشی سرمایہ کاری دے اہم شعبیں اتے موقع دیاں تفصیلات پیش کیتیاں اتے اسپیشل انویسٹمنٹ فسیلیٹیشن کونسل (ایس آئی ایف سی) دے سرمایہ کار دوست اقدامات دی تعریف کیتی جیڑھے غیر ملکی شراکت داراں دے ذریعے معاشی ترقی اچ تیزی گھن آوݨ اچ مددگار ثابت تھیندے پئن۔ سعودی عرب دے سفیر نواف بن سعید المالکی پاکستان دیاں اصلاحاتی کوششاں اتے نجی شعبے دے فعال کردار دی تعریف کریندے یقین ظاہر کیتا جو اے دورہ سعودی۔پاکستان اقتصادی تعاون نال نویں دور دا آغاز ثابت تھیسی، او آئی سی سی آئی اتے پی بی سی یقین ݙیوائے جو انہاں دے ادارے مقامی و غیر ملکی کمپنیاں دے نال مضبوط تعلقات رکھیندن اتے او سعودی عرب اتے پاکستان وچال لمبا عرصہ رہݨ آلے کاروباری اشتراک کوں ودھارا ݙیوݨ کیتے مؤثر کردار ادا کرݨ کیتے پُرعزم ہن