وفاقی وزیر اطلاعات عطاء اللہ تارڑ دا ایتھوپیا دے سفارت خانے دا دورہ

اسلام آباد۔10اکتوبر(اے پی پی) وفاقی وزیر اطلاعات و نشریات عطاء اللہ تارڑ ایتھوپیا دے سفارت خانے دا دورہ کیتا اتے پاکستان اچ تعینات ایتھوپیا دے سبکدوش تھیوݨ آلے سفیر ڈاکٹر جمال بیکر عبداللہ نال الوداعی ملاقات کیتی۔ وفاقی وزیر اطلاعات ݙوہیں ملکاں وچال تعلقات کوں مزید تکڑا اتے اُتے گھن ونڄݨ سانڳے ڈاکٹر جمال بیکر دے شاندار کردار اتے سفارتی خدمات کوں خراج تحسین پیش کریندے آکھیا جو ڈاکٹر جمال پاکستان اتے ایتھوپیا دے عوام دے وچال دوستی دے رشتے کوں مزید مستحکم کیتا۔ وفاقی وزیر اطلاعات ایتھوپیا دے وزیراعظم ڈاکٹر ابی احمد دی قیادت اچ ایتھوپیا اچ تھیوݨ آلی ترقی و تبدیلی دی تعریف کیتی ۔ انہاں آکھیا جو ڈاکٹر جمال بیکر پاکستان دے ہک سچے دوست ہن جنہاں ݙوہیں ملکاں دے وچال قربت اتے دوستی دے پُل تعمیر کیتے۔ وفاقی وزیر آکھیا جو پاکستان ٹیلی ویژن (پی ٹی وی) ایتھوپیا دے سفیر دی سفارتی خدمات تے ہک خصوصی دستاویزی پروگرام تیار کریسی جو ݙوہیں ملکاں دے وچال تعلقات دے ودھارے سانڳے کیتی ڳئی شاندار خدمات دے اعتراف اچ نشر کیتا ویسی۔ ایں موقع تے ڳالھ مہاڑکریندے ایتھوپیا دے سفیر آکھیا جو ایتھوپیا پاکستان دے نال آپݨے سفارتی تعلقات کوں ٻہوں اہمیت ݙیندے جیڑھا بین الاقوامی سطح تے ہک مؤثر کردار ادا کریندا پئے۔ ڈاکٹر جمال بیکر آپݨے دور سفارت دے دوران ݙو پاسے اتے کئی پاسوں تعاون ودھاوݨ اچ حکومت پاکستان اتے عوام دی بھرپور حمایت تے اظہار تشکر کیتا اتے آکھیا جو ݙوہیں ملکاں امن و سلامتی، ماحولیاتی استحکام، ہوا بازی، تجارت، سرمایہ کاری اتے سیاحت و ثقافت سودھے مختلف شعبیں اچ نیڑے تعاون کوں ودھارا ݙتا۔ انہاں آکھیا جو رابطے، معاشی سفارت کاری اتے ماحولیاتی استحکام دے شعبیں اچ ݙوہیں ملکاں دے تعلقات کوں مزید گھاٹا کرݨ تے اساکوں ماݨ اے۔ انہاں آکھیا جو ایتھوپیا دی ایئر لائنز پاکستان دی “لُک افریقہ” اتے “انگیج افریقہ” پالیسیاں دے ودھارے اچ کلیدی کردار ادا کریندی پئی اے جیں دے تحت اڳلے ہفتے ایتھوپیا دے دارالحکومت ادیس ابابا اچ پنجویں پاکستان-افریقہ ٹریڈ ڈویلپمنٹ کانفرنس اتے سنگل کنٹری ایگزیبیشن منعقد تھیندی پئی اے۔