دہشت گردی دے خلاف پاکستان دی قربانیاں پوری دنیا دے امن کیتے ہن، وفاقی وزیر اطلاعات عطاء اللہ تارڑ دی امریکی ناظم الامور نٹیلی بیکر نال ملاقات اچ ڳالھ مہاڑ

اسلام آباد۔11اکتوبر (اے پی پی) وفاقی وزیر اطلاعات تے نشریات عطاء اللہ تارڑ آکھیا جو دہشت گردی دے خلاف پاکستان دی قربانیاں پوری دنیا دے امن کیتے ہن۔ اے ڳالھ انہاں امریکی ناظم الامور نٹیلی بیکر نال ملاقات اچ ڳالھ مہاڑ کریندیں ہوئیں آکھی۔ ملاقات اچ ݙو پاسے تعلقات، ڈیجیٹل میڈیا شراکت داری سودھے مختلف معاملیاں تے ڳالھ مہار تھئی۔ امریکی ناظم الامور آکھیا جو پاکستان دی معیشت استحکام اتے ترقی آلے پاسے ودھدی پئی اے۔ ملاقات اچ دہشت گردی دے خلاف پاکستان دے اڳوں رہݨ آلے کردار کوں سراہیا ڳیا۔ ایں موقع تے وفاقی وزیر اطلاعات آکھیا جو دہشت گردی دے خلاف پاکستان اڳوں رہݨ آلے کردار ادا کریندا پئے، دہشت گردی دے خلاف اساݙی قربانیاں پوری دنیا دے امن کیتے ہن۔ انہاں آکھیا جو حکومت فیک نیوز دے خاتمے اتے ڈیجیٹلائزیشن دے فروغ کیتے جامع پالیسی متعارف کرائی اے جنہاں کوں ٻیا اُجاگر کرݨ دی لوڑھ اے۔ سیاحت دا ذکر کریندیں ہوئیں وفاقی وزیر اطلاعات آکھیا جو پاکستان قدرتی حُسن، ثقافتی تنوع اتے تاریخی ورثے نال مالا مال ملک اے، سیاحت دے فروغ نال نہ صرف معاشی سرگرمیاں اچ وادھا ہوسی بلکہ ݙوہیں ملکاں دی عوام وچال رابطے وی مضبوط تھیسن۔ انہاں آکھیا جو حکومت سیاحت دے فروغ کیتے پکے اقدامات کریندی پئی اے تاںجو پاکستان کوں عالمی سیاحتی نقشے تے نمایاں مقام حاصل تھی سڳے۔ انہاں آکھیا جو صحافیاں دی فلاح و بہبود کیتے وی قانون سازی کیتی ویندی پئی اے۔ امریکی ناظم الامور پاکستان ولوں صحافیاں دے تحفظ کیتے اقدامات کوں سراہیا۔