سیکورٹی فورسز بھارتی پراکسی فتنہ الخوارج دے پولیس ٹریننگ سکول تے حملے کوں ناکام بݨایا، آئی ایس پی آر

راولپنڈی۔11اکتوبر (اے پی پی) بھارتی پراکسی فتنہ الخوارج توں تعلق رکھݨ آلے خوارج 10 اتے 11 اکتوبر 2025 دی رات کوں ہک بزدلانہ دہشت گردانہ حملے اچ پولیس ٹریننگ سکول کوں نشانہ بݨایا پر قانون نافذ کرݨ آلے اداریاں دے اہلکاراں دے چوکس اتے پکے عزم نال ردعمل انہاں دے خراب ارادیاں کوں جلدی نال ناکام بݨا ݙتا۔ آئی ایس پی آر ولوں جاری بیان دے مطابق حملہ آوراں حفاظتی حصار کوں ٻھنݨ دی کوشش کیتی، پر ایں اچ ناکامی تے حملہ آوراں دھماکہ خیز مواد نال بھری ہک گڈی کوں گیٹ نال ٹکرایا۔ پولیس اہلکاراں بے مثال ہمت اتے پیشہ ورانہ مہارت دا مظاہرہ کریندیں ہوئیں حملہ آوراں دا مقابلہ کیتا اتے بھارتی پراکسی فتنہ الخوارج توں تعلق رکھݨ آلے 3 خوارج کوں جہنم واصل کر ݙتا۔ باقی ݙو حملہ آوراں کوں ہک عمارت دے کمپلیکس اچ گھیر ڳھدا ڳیا، جنہاں کوں بعد اچ سیکورٹی فورسز ہک منظم کلیئرنس آپریشن اچ سِدھا نشانہ بݨا تے جہنم واصل کر ݙتا۔ ایں شدید فائرنگ دے تبادلے اچ ٹرینراں سودھے 6 اہلکاراں بہادری نال لڑدیں ہوئیں جام شہادت نوش کیتا جݙاں جو 12 پولیس اہلکار اتے ہک معصوم شہری وی زخمی تھیے۔ ایں حملے اچ خوارج سکول کمپلیکس دے اندر موجود مسجد تے حملہ کیتا اتے نہ صرف مقدس عبادت گاہ دی بے حرمتی کیتی بلکہ امام مسجد کوں جو امامت دے فرائض سرانجام ݙیندے پئن، ہک معصوم شہری کوں وحشیانہ طور تے شہید کر ݙتا۔ علاقے اچ کلیئرنس آپریشنز جاری اے اتے ایں بزدلانہ کَم دے مرتکب لوکاں کوں انصاف دے کٹہرے اچ گھن آیا ویسی۔ آئی ایس پی آر موجب سیکورٹی فورسز پاکستانی قانون نافذ کرݨ آلے اداریاں دے نال رَل تے قوم دے نال شاناں بہ شاناں ملک توں بھارتی سرپرستی اچ تھیوݨ آلی دہشت گردی دے خاتمے کیتے پکا عزم رکھدن اتے اساݙے بہادر سپاہیاں اتے معصوم شہریاں دی ایہو سویں قربانیاں اساݙے وطن دی حفاظت کیتے اساݙے نہ مُکݨ آلے عزم کوں ٻئی مضبوط کریندن۔