انتشار خان کیتے آپݨے علاوہ کوئی شئے اہمیت نئی رکھدی، او خیبر پختونخوا حکومت کوں دہشت گرداں نال معاونت دا کھیندا پئے، ریاست پاکستان اچ دہشت گرداں دی کوئی جاہ کائنی، عطاء اللہ تارڑ

لاہور۔11اکتوبر (اے پی پی) وفاقی وزیر اطلاعات تے نشریات عطاء اللہ تارڑ آکھیا جو انتشار خان کیتے آپݨے علاوہ کوئی شئے اہمیت نئی رکھدی، او خیبر پختونخوا اچ تحریک انصاف دی حکومت کوں دہشت گرداں نال معاونت دا آکھیندا پئے، انتشار پسنداں دی خواہش اے جو ملک اچ حالات خراب کیتے ونڄن، ریاستِ پاکستان اچ دہشت گرداں دی کوئی جاہ کائنی، اساݙے کیتے پاکستان ہر شخصیت توں پہلے اے، اساں خیبر پختونخوا دے غیرت مند عوام دی قربانیاں کوں ضائع نہ تھیوݨ ݙیسوں۔ دہشت گردی دا خاتمہ تھیسی اتے دہشت گرداں دے سہولت کاراں کوں رسوائی دا سامݨا کرݨا پوسی۔ ہفتہ کوں اتھاں میڈیا نال ڳالھ مہاڑ کریندے ہوئیں وفاقی وزیر اطلاعات آکھیا جو گزریل ہک ہفتے دے دوران دہشت گرداں دی ولوں بہوں ساریاں کارروائیاں کیتی ڳئن جنہاں دا پاک فوج دے افسراں اتے جواناں انتہائی جرت اتے بہادری نال مقابلہ کیتا، اساݙے بہادر سپاہیاں وطن دے دفاع اچ جامِ شہادت نوش کیتا۔ انہاں آکھیا جو تحریک انتشار کوں شہیداں دی قربانیاں اتے ملک دی سلامتی نال کوئی غرض کائنی، ایں کوں صرف خیبر پختونخوا اچ ونݙ پیدا کرݨ، حالات خراب کرݨ اتے دہشت گرداں کوں ایں صوبے اچ محفوظ پناہ گا ہاں فراہم کرݨ نال غرض اے۔ انہاں آکھیا جو اے قصہ اج دا نئی ، پچھلی کئی ݙھاکیاں توں بانی چیئرمین پی ٹی آئی اتے انہاں دی جماعت دا اے طریقہ اے جو او مقامی، علاقائی اتے بین الاقوامی سطح تے دہشت گرداں دے ہمدرد اتے انہاں دے سہولت کار بݨیے رہن۔ وفاقی وزیر اطلاعات آکھیا جو پاکستانی قوم ہکّلی قوم جئیں دے نِکّے بالاں دہشت گردی دے خلاف بے مثال قربانیاں ݙتیاں، اساں کیویں بُھل سڳدوں جو اے پی ایس پشاور دے شہید بالاں آپݨے خون نال ایہو جیہی داستان لِکھی جو تاریخ اچ ہمیشہ زندہ رہسی۔ انہاں خضدار بس حملے اچ شہید تھیوݨ آلے بالاں دا وی حوالہ ݙتا اتے آکھیا جو جݙاں او صحافیاں دے نال خضدار اتے کوئٹہ ڳئے تاں ہک والد، جئیں دے ترائے بال ایویں واقعے اچ فوت تھی ڳئے ہن، پوری ہمت و حوصلے نال کھیندا پیا ہا جو میݙی جان وی پاکستان کیتے حاضر ہے۔ انہاں ٻیا آکھیا جو خیبر پختونخوا دے غیرت مند عوام لازوال قربانیاں ݙتن اتے افواجِ پاکستان، سویلین، تاجر، ڈاکٹر، انجینئرز، نِکّے بال اتے معاشرے دے ہر طبقے ایں قربانی دی داستان اچ روشن باب دا کردار ادا کیتے۔ انہاں آکھیا جو جݙاں ایں قوم نیشنل ایکشن پلان دے تحت اے عزم کیتا جو دہشت گرداں کوں شکست ݙے تے ملک توں دہشت گردی دا خاتمہ کیتا ویسی تاں پوری قوم رَل ڳئی۔ آپریشن ضربِ عضب اتے ردالفساد دے دوران پاک فوج، صوبائی حکومتاں اتے سارے ریاستی اداریاں آپݨی ذمہ واریاں بھرپور طریقے نال ادا کیتی، جئیں دے نتیجے اچ دہشت گردی کوں شکست ݙتی ڳئی۔ انہاں آکھیا جو او ہک ایہو جیہا دور ہا جݙاں اساݙے کرکٹ دے میدان وِیران ہن، ملک دے ہر شہر اچ تقریباً روز دہشت گردی دے واقعے تھیندے ہن، اساݙے علما، فوجی افسر، نِکّے بال اتے عام شہری قربانیاں ݙیندے پئے ہن۔ پریڈ لین دی مسجد اچ تھیوݨ آلے دھماکے اچ ریٹائرڈ فوجی، نِکّے بال اتے نمازی شہید تھیے۔ وفاقی وزیر اطلاعات آکھیا جو انہاں دہشت گرداں دا نہ کوئی دین اے، نہ کوئی مذہب، نہ کوئی رنگ اتے نہ کوئی نسل، اے صرف تشدد، خونریزی اتے خوف کھنݙاوݨ تے یقین رکھدن، انہاں دا کہیں مذہب یا انسانی قدراں نال کوئی تعلق نئی۔ انہاں آکھیا جو ریاستِ پاکستان کلمۂ طیبہ دے ناں تے وجود اچ آئی۔ پاکستان دا مطلب کیا ،لا الہ الا اللہ، دے نعرے تے قائم ایہو جیہی ریاست اے جئیں کوں دنیا ہک مضبوط اسلامی ملک دے طور تے تسلیم کریندی اے۔ انہاں آکھیا جو ایں ریاست دی مسیداں، افواج اتے شہریاں تے حملہ کہیں صورت جائز نی اتے اسلام دی رُوح وی ایں دی بالکل اجازت نئی ݙیندی۔ ایں حوالے نال ملک دے وݙے علما پہلے فتویٰ ݙے چُکین جو پاکستان دی ریاست دے خلاف کوئی جہاد نئی تھی سڳدا۔وفاقی وزیر اطلاعات تے نشریات عطاء اللہ تارڑ آکھیا جو اے او لوک ہن جو مسیتاں کوں وی نئی بخشدے۔ سارے شہیداں دی قربانیاں اج وی زندہ ہن، انہاں دے خون دے صدقے پاکستان ہک فلاحی ریاست بݨݨ دی ول ودھدا پئے۔ انہاں آکھیا جو لاہور دی جامعہ نعیمیہ دھماکے اچ ممتاز عالم دین ڈاکٹر سرفراز نعیمی آپݨے خون نال قربانی دی ہک لازوال داستان لِکھی۔ ایں وطن دی آبیاری اچ علمائے کرام دا خون وی شامل اے۔ راولپنڈی اچ ٹریفک سگنل تے آرمی میڈیکل کور دے جنرل مشتاق کوں شہید کیتا ڳیا۔ اے او المناک واقعے ہن جو ضربِ عضب اتے ردالفساد توں پہلے ملک دے چوکاں، چوراہیاں، گلی محلیاں اتے مسیتاں اچ تھیندن۔ بعد اچ پاک فوج دے افسراں اتے جواناں بے مثال قربانیاں ݙے تے دہشت گرداں کوں پچھوں کیتا، دشمن کوں شکست ݙتی اتے ملک اچ امن قائم کیتا۔ اے او تاریخ ہے جو ہمیشہ یاد رکھی ویسی جݙاں دہشت گردی دا خاتمہ تھیا، کرکٹ دے میدان ول آباد تھیے اتے پاکستان ترقی دی راہ تے ودھیا۔ انہاں آکھیا جو جیل اچ قید ہک بندے دے نیڑے انہاں قربانیاں دی کوئی اہمیت نئی، ایںدے نیڑے سَب کُجھ ایں ڳالھ تئیں محدود اے جو سیاست کوں کیویں چمکایا ونڄے۔ انہاں دے پیروکار او لوک ہن جو نعرہ لیندن “خان نئی تاں پاکستان نئی، اساں ایہو جیہی سیاست کوں لعنت سمجھدے ہن جو کہیں شخصیت دی پیروی کر تے ملک کوں پچھوں گھن ونڄے اتے شخصیت کوں پہلے رکھے۔ کݙاہیں کہیں سیاسی جماعت ایہو جیہا نعرہ نئی لاتا۔ انہاں آکھیا جو جݙاں محترمہ بے نظیر بھٹو شہید تھیاں تاں پیپلز پارٹی دی قیادت “پاکستان کھپے” دا نعرہ لا تے ملک دے استحکام دا پیغام ݙتا۔ مسلم لیگ (ن) دی قیادت وی مشکل توں مشکل حالات اچ ہمیشہ پاکستان دی ڳالھ کیتی۔ بانی چیئرمین پی ٹی آئی دے دور اچ جݙاں اساݙی پوری جماعت جیل اچ ہائی، شہباز شریف، جو اوں ویلھے قائدِ حزبِ اختلاف ہن، پارلیمنٹ دے ایوان اچ کھڑے تھی تے آکھدے پئے ہن جو اساں ملک دے مفاد اچ میثاقِ معیشت کرݨ چاہندوں۔ اے انہاں دی دوراندیشی ہائی جو شہباز شریف سمجھدے ہن جو معیشت مضبوط تھیسی تاں ملک اڳوں ودھسی۔ سارے سیاسی انتقام اتے اختلافاں دے باوجود انہاں ہمت اتے حوصلے نال قومی مفاہمت دی ڳالھ کیتی، پر انتشار خان کوں اے ڳالھ سمجھ نہ آئی کیوں جو ایں کیتے آپݨی ذات اتے آپݨی جماعت ای سَب کُجھ ہئی، پاکستان دی کوئی اہمیت کائنا ہئی۔ انہاں آکھیا جو بزدلی دا عالم ہا جو فلور آف دی ہاؤس دے بعد پلوامہ واقعے تے جݙاں بانی چیئرمین پی ٹی آئی کوں موقف اختیار کرݨ کوں آکھیا ڳیا تاں انہاں آکھیا جو میں کیا کراں، میں بھارت تے حملہ کر ݙیواں؟ پر جݙاں بھارت للکاردا ہے تاں انتشار خان پچھوں ہٹ ویندے ہن، جݙاں دہشت گرداں دا مقابلہ کرݨ دی واری آندی اے تاں انہاں دے مُنہ توں مذمت دے لفظ وی نئی نکلدے۔ شہیداں دی یاد مݨاوݨ دے موقع تے نو مئی سویں واقعے کر تے یادگاراں کوں نقصان پڄاوݨا اتے نعرہ لاوݨا اے “خان نئی تاں پاکستان نئی”، شخصیت کوں ہر شئے توں اُتے رکھ تے ملک کوں پچھے سٹݨ دی ایہا سوچ ایں پارٹی دا مقصد بݨ ڳئی اے۔ انہاں آکھیا جو شہیداں دی قربانیاں کوں پِٹھ ݙیندے ہوئیں بانی چیئرمین پی ٹی آئی بین الاقوامی میڈیا تے ونڄ تے اے آکھدے رہے جو ویلھا آ ڳئے جو تحریک طالبان پاکستان نال صلح کیتی ونڄے، اے چنڳے لوک ہن، انہاں نال ڳالھ مہاڑ کیتی ونڄے اتے ول ایویں عنصراں کوں سیٹل ایریاز اچ گھن آ تے وساوݨ دی کوشش کیتی ڳئی۔ وفاقی وزیر اطلاعات آکھیا جو پولیس اتے قانون نافذ کرݨ آلے اداریاں آپݨے رَت نال قربانیاں دی ہک لازوال داستان لِکھی اے، انہاں قربانیاں دے باعث ملک توں دہشت گردی دا خاتمہ ممکن تھیا۔ انہاں آکھیا جو 2017 اچ پاکستان توں دہشت گردی دا مکمل خاتمہ تھیا جئیں دے پچھوں بے شمار لوکاں دی جدوجہد اتے بہادری ہئی۔ اج وی او خاندان، جنہاں دے پُت اتے بھراواں وطن کیتے آپݨیاں جاناں قربان کیتی، فخر نال آکھدے ہن جو اساݙے پیاریاں پاکستان کیتے آپݨی جان دا نذرانہ پیش کیتا۔ انہاں آکھیا جو قربانی کݙاہیں ضائع نئی ویندی۔ ایں مملکت خداداد تے جان قربان کرݨ آلے بہادر سپوتاں دی قربانیاں انشاء اللہ رنگ گھن آسن اتے او ݙینھ دور نئی جݙاں دہشت گردی ایں ملک توں مکمل طور تے ختم تھیسی اتے دہشت گرد رسوائی اتے ذلت دا سامݨا کریسن۔ عطاء اللہ تارڑ آکھیا جو ہک سیاسی جماعت اج وی دہشت گرداں دا ساتھ ݙیندی اتے انہاں دی حمایت کریندی اے۔ ایں جماعت منصوبہ بندی دے تحت دہشت گرد عنصراں کوں واپس گھن آ تے آباد کیتا اتے جݙاں 2017 اچ دہشت گردی دا خاتمہ تھی تے ملک اچ امن بحال تھیا تاں 2018 اچ خیبرپختونخوا اچ تحریکِ انتشار دی حکومت ول انہاں عنصراں دی سرپرستی کیتی۔ وفاقی وزیر آکھیا جو ہک غیرقانونی دائرے دے تحت خیبرپختونخوا دی اڳلی انتظامیہ سمگلنگ اتے غیرقانونی تجارت کوں فروغ ݙیندی پئی ہئی جئیں اچ نان کسٹم پیڈ گاݙیاں، تیل، کھاوݨ آلی شئیں، اجناس، منشیات، ٹمبر اتے تمباکو دی اسمگلنگ شامل اے، اے سمگلنگ دا ہک نیٹ ورک ہے جئیں اچ دہشت گرداں اتے خیبر پختونخوا دی تحریک انصاف دی حکومت دا گٹھ جوڑ اے، ایں توں انہاں کوں مالی فائدہ مِلدے۔ انہاں آکھیا جو موجودہ معاشی اصلاحات دے تحت انہاں عنصراں تے ہتھ سٹیا ویندا پئے اتے انہاں دے آلے ݙوآلے گھیرا تنگ کیتا ویندا پئے۔ انہاں آکھیا جو دہشت گردی کوں فروغ ݙیوݨ اچ ہک غیر دستاویزی بلیک اکانومی کَم کریندی پئی اے جئیں توں تحریکِ انتشار کوں مالی معاونت مِلدی اے اتے ایںدے زور تے انہاں دی سیاست ودھدی اے۔ انہاں آکھیا جو پی ٹی آئی دی خیبر پختونخوا اچ 12 سالہ حکومت سمگلنگ اتے غیر قانونی معیشت دے نیٹ ورک توں بھرپور مالی فائدہ چاتا جئیں اچ تحریکِ انتشار دے مرکزی کردار شامل رہیے جنہاں بانی چیئرمین پی ٹی آئی دی فنڈنگ تئیں کیتی۔وفاقی وزیر آکھیا جو جݙاں نویں وزیراعلیٰ دے چُݨݨ دی واری آئی تاں انہاں ایہو جیہے بندے کوں چُݨیا جئیں تے مقدمے درج ہن اتے جئیں دے بارے اچ اے تاثر عام اے جو او منشیات دے کاروبار اچ ملوث اے۔ وفاقی وزیر اطلاعات آکھیا جو بانیِ چیئرمین دا اے آکھݨ جو اے این پی ختم تھی ڳئی، بے بنیاد اے، حقیقت اے ہے جو اے این پی دہشت گردی دے خلاف پکے پیراں تے کھڑی رہی۔ میں بشیر احمد بلور اتے شہید ہارون بلور کوں سلام پیش کرینداں، اے این پی دی قربانیاں اساݙی سیاسی تاریخ اچ ہمیشہ یاد رکھی ویسن۔ جݙاں تاریخ لکھی ویسی تاں ایہا درج ہوسی۔ ݙوجھی ول تحریکِ انتشار دہشت گرداں دے نال ݙیوݨ اچ ای عافیت سمجھی، دہشت گرداں کوں سیٹلڈ ایریاز اچ گھن آ تے وسایا، انہاں نال کاروبار اتے روزمرہ دے رابطے قائم کیتے جئیں دا خمیازہ اج پوری قوم بھوڳیندی پئی اے۔ اساں روز لاشاں چیندے پئیوں، اے ہݨ نہ چلسی۔ انہاں آکھیا جو میں لیفٹیننٹ جنرل احمد شریف دی گزریل ݙینھ دی پریس کانفرنس دی تائید کرینداں جو ہݨ اے معاملہ مزید نئی چل سڳدا، ہݨ فیصلہ کرݨا ہوسی جو تساں دہشت گرداں دے نال ہَن یا انہاں دے خلاف۔ او دہشت گرد جو روز اساݙے شہریاں کوں شہید کریندے پئن، اساں روز لاشاں چیندے پئیوں اتے انہاں دا مقابلہ کریندے پئیوں پر ݙوجھی ول خیبر پختونخوا اچ حکومتی حلقے اے تاثر ݙیندے پئن جو اساں انہاں دی سہولت کاری کریسوں، انہاں نال کاروبار کریسوں اتے سمگلنگ اچ ملوث ہوسوں۔ انہاں آکھیا جو اے تاثر پاتا ویندا پئے جو ٹی ٹی پی، پی ٹی آئی دا عسکری ونگ بݨدا ویندے، اللہ کرے ایویں نہ تھیوے، پر ایں تاثر دیاں وجہاں غیرقانونی سرگرمیاں، سمگلنگ اتے انتظامی معاملیاں اچ لُکیاں ہن۔ انہاں سوال چاتا جو کے پی حکومت ٹمبر مافیا، تمباکو مافیا اتے نان کسٹم پیڈ گاݙیاں دے کاروبار دے خلاف کارروائی کیوں نہیں کیتی؟ ارباں روپے دے ٹیکس ریونیو جو خیبرپختونخوا دی عوام دی فلاح و بہبود کیتے تھیوݨا چاہیدا ہا، او کٹھا کیوں نہیں تھیوݨ ݙتا ویندا پیا کیوں جو اُتھاں رَل ملی بھگت اے۔ انہاں آکھیا جو نامزد وزیراعلیٰ دے خلاف تحریکِ انصاف دے اندروں اختلافی آوازاں شدت گھن آندیاں پئن جو اساں کوں اے قبول نئی، ہک ول شیر افضل مروت اتے علیمہ خان دا گروپ اے اتے ݙوجھی ول بشری بی بی دا گروپ، جئیں نال پارٹی ٹُٹݨ دا شکار نظر آندی اے، انہاں دا آپݨا گھر ترتیب وار نئی، کے پی اسمبلی اچ انہاں کوں وݙیاں مشکلات دا سامݨا اے۔ ایہو سویں بندے کوں گھن آوݨ دا مقصد واضح طور تے اے جو او دہشت گرداں دے خلاف مؤثر موقف اختیار نہ کرے اتے بزدلی ݙکھیندیں ہوئیں انہاں دے خلاف آپریشن نہ کر سڳے۔ ہݨ اے نہ چلسی۔ ریاستِ پاکستان کہیں بندے یا جماعت کوں دہشت گرداں دی حمایت دی اجازت ہرگز نہ ݙیسی۔ وزیراعظم وی گزریل ݙینھ واضح کیتا جو یا تاں تساں پاکستان دے خلاف لڑدے پئیو یا پاکستان کیتے لڑدے پئیو؛ اے ݙو ہی کیٹیگریز ہن، ایں دے علاوہ کوئی ٻئی گنجائش کائنی جو دہشت گرداں کوں مزید پروموٹ کیتا ونڄے۔ وفاقی وزیر اطلاعات آکھیا جو ریاستِ پاکستان اے فیصلہ کر ڳھدے جو دہشت گرداں کوں انشاء اللہ ہر صورت شکست ݙتی ویسی اتے انہاں کوں ملک اچ رہݨ دی اجازت ہ ݙتی ویسی۔ اے عناصر کݙاہیں افغانستان توں آ تے حملے کریندن اتے کݙاہیں ہندوستان دی سپورٹ نال حملہ کریندن، انہاں کوں ایں ڳالھ نال کوئی غرض نئی جو عورتاں، نِکّے بال اتے بُڈّھے انہاں حملیاں اچ شہید تھیندے پئن۔ انہاں آکھیا جو پی ٹی آئی دے سربراہ جیل اچ بہہ تے وی دہشت گرداں دی حمایت جاری اے اتے جݙاں امن خراب تھیندے تاں او چاہندے ہن جو صوبائی حکومت ول انہاں دی پشت پناہی کرے تاں جو انہاں دے غیر قانونی کاروبار اتے سمگلنگ توں مِلݨ آلی آمدنی برقرار رہے۔ اے ہک منظم گٹھ جوڑ اے جو ہݨ نہیں چل سڳدا۔ وفاقی وزیر آکھیا جو پاک فوج، پولیس اتے ݙوجھے سکیورٹی ادارے روزانہ قربانیاں ݙیندے پئن اتے حکومتِ پاکستان آخری دہشت گرد دے خاتمے تئیں سکون نال نہ بہسی۔ افواجِ پاکستان، سول ادارے اتے علمائے کرام سَب ہک پیج تے ہن، دہشت گردی دی ٻئی کوئی گنجائش کائنی ۔ انہاں آکھیا جو ملک ترقی کریندا پئے، معیشت چنڳی تھیندی پئیاہے، خارجہ پالیسی دی پوری دنیا تعریف کریندی پئی اے جݙاں جو جیل اچ بیٹھے بندے تے 190 ملین پاؤنڈ دا میگا کرپشن کیس اے، او آپݨی ذات اتے مفاد دی خاطر پاکستان کوں قربان کرݨ چاہندے، اے نئی تھی سڳدا، پاکستان انشاء اللہ ٻئی ترقی کریسی، دہشت گردی دا خاتمہ تھیسی۔ انہاں آکھیا جو خیبرپختونخوا دی غیرت مند عوام جو قربانیاں ݙتن، انہاں کوں ضائع نہ تھیوݨ ݙتا ویسی۔ دہشت گردی دا خاتمہ تھیسی، دہشت گرداں دے سہولت کاراں اتے دہشت گرداں کوں آپݨے مالی تے سیاسی فائدے کیتے سپورٹ کرݨ آلیاں کوں رسوائی دا سامݨا کرݨا پوسی۔