پاکستان آپݨے قومی مفادات، علاقائی خودمختاری اتے سلامتی دے تحفظ کیتے پُرعزم اے، جموں و کشمیر تے کہیں وی متنازعہ یا گُمراہ کرݨ آلے موقف کوں پاکستان کݙاہیں قبول نہ کریسی، صدر مملکت آصف علی زرداری

اسلام آباد۔12اکتوبر (اے پی پی) صدر مملکت آصف علی زرداری آکھیا جو پاکستان آپݨے قومی مفادات، علاقائی خودمختاری اتے سلامتی دے تحفظ کیتے پُرعزم اے، جموں تے کشمیر تے کہیں وی متنازعہ یا گُمراہ کرݨ آلے موقف کوں پاکستان کݙاہیں قبول نہ کریسی، بھارت ولوں کشمیر بارے ہر غیر قانونی دعویٰ عالمی قوانین اتے اقوامِ متحدہ دی قرارداداں دے خلاف اے۔ اتوار کوں ایوان صدر دے پریس ونگ توں جاری بیان دے مطابق صدرِ مملکت آصف علی زرداری افغانستان ولوں جارحیت تے ردِعمل ݙیندیں ہوئیں آکھیا جو پاکستان آپݨے قومی مفادات، علاقائی خودمختاری اتے سلامتی دے تحفظ کیتے پُرعزم اے۔ صدرِ مملکت افسوس دا اظہار کریندیں ہوئیں آکھیا جو افغان قیادت مقبوضہ جموں و کشمیر دے مظلوم عوام دی جدوجہدِ آزادی توں مُنہ موڑ تے تاریخ اتے اُمت ݙوہیں نال ناانصافی کیتی، عبوری افغان حکومت دی سرزمین توں فتنہ الخوارج دے حملے اقوامِ متحدہ دی رپورٹاں توں وی ثابت شدہ حقیقت ہن، پاکستان بہوں واری واضح کیتے جو فتنہ الخوارج اتے فتنہ الہندوستان دے گٹھ جوڑ نال پاکستان دے شہری اتے سکیورٹی اہلکار نشانہ بݨیندے پئن۔ صدرِ مملکت افغان قیادت تے زور ݙتا جو او پاکستان مخالف دہشت گرد عنصراں دے خاتمے کیتے عملی اقدامات کرے۔ انہاں آکھیا فتنہ الخوارج اتے فتنہ الہندوستان خطے دے امن اتے استحکام کیتے سَب توں وݙا خطرہ ہن، دہشت گردی دے خلاف جنگ مشترکہ ذمہ واری اے، کہیں ہک ملک تے ایں دا بوجھ نی سٹیا ونڄ سڳدا، پاکستان چار دہائیاں تئیں افغان عوام دی میزبانی کر تے اسلامی اخوت اتے چنڳی ہمسائیگی دی مثال قائم کیتی، امن دی بحالی دے نال افغان شہریاں دی باعزت واپسی ݙوہیں ملکاں دے مفاد اچ اے، پاکستان افغان عوام دی تعلیمی اتے انسانی ضرورتاں کیتے تعاون جاری رکھیسی، پاکستان آپݨی قومی خودمختاری تے کوئی سمجھوتہ نہ کریسی۔صدر مملکت آکھیا جو پاکستان تجارت، معیشت اتے رابطیاں دے فروغ کیتے افغانستان کوں ہر ممکن سہولت ݙتی اے، آپسی تعاون اتے معاشی شراکت ای خطے دے پائیدار امن اتے ترقی دی بنیاد اے، پاکستان ہک پُرامن، مستحکم اتے خوشحال افغانستان دا خیر خواہ اے، برادرانہ تعلقات آپسی احترام، سکیورٹی تعاون اتے خطے دے امن نال جُڑین۔ صدر مملکت آکھیا جو پاکستان توقع کریندے جو عبوری افغان حکومت آپݨی سرزمین کوں فتنہ الخوارج اتے فتنہ الہندوستان دے دہشت گرد عنصراں دے استعمال توں روکیسی، دہشت گردی دے خلاف مشترکہ اتے عملی اقدامات ہی لمبا پائیدار امن دی ضمانت ہن۔