پاکستان دے دفاع تے کوئی سمجھوتہ نہ کریسوں، ہر اشتعال انگیزی دا بھرپور اتے مؤثر جواب ݙتا ویسی، وزیراعظم شہباز شریف

لاہور ۔12اکتوبر (اے پی پی) وزیراعظم محمد شہباز شریف افغانستان ولوں پاکستان دے سرحدی علاقیاں اچ اشتعال انگیزی دی شدید مذمت کریندیں ہوئیں بھرپور اتے مؤثر کارروائی تے پاک فوج کوں خراج تحسین پیش کیتے اتے آکھیا جو پاکستان دے دفاع تے کوئی سمجھوتہ نہ کریسوں، ہر اشتعال انگیزی دا بھرپور اتے مؤثر جواب ݙتا ویسی۔ اتوار کوں وزیر اعظم آفس دے میڈیا ونگ ولوں جاری بیان دے مطابق وزیر اعظم پاک فوج دی پیشہ ورانہ مہارت دی تعریف کریندیں ہوئیں آکھیا جو فیلڈ مارشل سید عاصم منیر دی بے باک قیادت اچ پاک فوج افغانستان دی اشتعال انگیزی دا نہ صرف بھرپور جواب ݙتا بلکہ انہاں دی بہوں ساریاں پوسٹاں کوں تباہ کر تے انہاں کوں پِچھے ہٹݨ تے مجبور کیتا۔ وزیر اعظم آکھیا جو پاکستان دے دفاع تے کوئی سمجھوتہ نہ تھیسی اتے ہر اشتعال انگیزی دا بھرپور اتے مؤثر جواب ݙتا ویسی۔ انہاں آکھیا جو اساݙا دفاع مضبوط ہتھ اچ ہے اتے اساں ملک دے چپے چپے دا دفاع کرݨ چنڳی طرح جانݨدوں، پاک فوج ہمیشہ ہر طرح دی بیرونی جارحیت دا مُنہ توڑ جواب ݙتے۔ وزیراعظم آکھیا جو پوری قوم پاکستان دی سکیورٹی فورسز دے نال کھڑی اے، پاکستان کئی واری افغانستان کوں اُتھاں موجود فتنۃ الخوارج اتے فتنۃ الہندوستان جیڑھے دہشت گرد عنصراں دے بارے اچ معلومات ݙتن جو افغانستان دی سرزمین توں پاکستان دے خلاف کارروائیاں کریندے پئن، دہشت گرد تنظیماں کوں افغانستان اچ موجود عنصراں دی حمایت حاصل اے۔ وزیراعظم آکھیا جو پاکستان توقع کریندے جو افغان عبوری حکومت ایں امر کوں یقینی بݨیسی جو ایں دی سرزمین پاکستان دے خلاف دہشت گرد عنصراں دے استعمال اچ نہ آوے۔