پاکستان ہمیشہ تحمل نال کَم ڳھدا، خودمختاری اتے شہریاں دی سلامتی تے کوئی سمجھوتہ نہ کریسوں، وفاقی وزیر داخلہ محسن نقوی

اسلام آباد۔12اکتوبر (اے پی پی) وفاقی وزیرداخلہ محسن نقوی افغانی فورسز ولوں پاکستانی سرزمین تے بِلا اشتعال فائرنگ دے واقعے دی شدید مذمت کریندیں ہوئیں آکھیا جو پاکستان ہمیشہ تحمل نال کَم ڳھدے پر او آپݨی خودمختاری اتے آپݨے شہریاں دی سلامتی تے کوئی سمجھوتہ نہ کریسی، پاکستان دی بہادر فورسز آپݨے فوری اتے مؤثر ردعمل نال ثابت کیتے جو کہیں وی اشتعال انگیزی کوں کݙاہیں برداشت نہ کیتا ویسی۔ اتھاں جاری بیان دے مطابق انہاں آکھیا جو افغانستان دا عمل بین الاقوامی قانون دی صریح خلاف ورزی اتے علاقائی امن کیتے سِدھا خطرہ اے۔ وزیر داخلہ آکھیا جو افغانی فورسز ولوں شہری آبادی تے فائرنگ بین الاقوامی اصولاں اتے انسانی ہمدردی دے ضابطیاں دی کُھلی خلاف ورزی اے۔انہاں آکھیا جو پاکستان دی مسلح افواج مکمل طور تے چوکس اتے کہیں وی جارحیت دا فیصلہ کن جواب ݙیوݨ کیتے تیار ہن، افغانستان کوں مناسب اتے متناسب جواب ݙتا ویندا پئے، کہیں وی دشمنانہ اقدام دا مقابلہ طاقت اتے عزم نال کیتا ویسی۔ انہاں آکھیا جو افغانی فورسز ولوں حالیہ کشیدگی پاکستان دے ‘ہمیشگی دے دشمن’ دے اثر و رسوخ دا نتیجہ معلوم تھیندی اے، جو خطے کوں غیر مستحکم کرݨ دی کوشش کریندے پئن، افغانستان جو ٻھاہ اتے رَت دا کھیڈ کھیݙدا پئے، ایںدے ڳوڑھ تعلقات اساݙے انہاں دشمنان نال ہن جو ہمیشہ پاکستان دے استحکام کوں نقصان پڄاوݨ دی کوشش کریندے رہین۔ خارجی جارحیت دے مقابلے اچ قومی یکجہتی دی تصدیق کریندیں ہوئیں محسن نقوی آکھیا جو پاکستانی عوام آپݨی مسلح افواج دے نال مضبوطی نال کھڑن۔ انہاں قوم کوں آپݨے محافظاں دے پچھوں ’’فولادی کندھ‘‘ قرار ݙتا۔ انہاں آکھیا جو افغانستان کوں واضح اتے سخت جواب مِلسی، جیڑھا جو بھارت کوں اوں ویلھے مِلیا جݙاں ایں پاکستان دے صبر دا امتحان ڳھدا۔ انہاں خبردار کیتا جو کوئی وی ملک پاکستان ݙے بُرے ارادیاں نال نہ ݙیکھے۔ سکیورٹی ذریعیاں تصدیق کیتی اے جو پاکستان دی فورسز ہائی الرٹ تے ہن اتے سرحدی کمیونٹیز دی حفاظت کیتے ودھ اقدامات کیتے ویندے پئن۔