افغان طالبان اتے بھارتی حمایت یافتہ فتنہ الخوارج بے بلا اشتعال حملہ کیتا، پاکستان دی بھرپور جوابی کارروائی اچ 200 توں ودھ طالبان اتے دہشت گرد ہلاک تھیے، آئی ایس پی آر

راولپنڈی۔12اکتوبر (اے پی پی) پاک فوج دے محکمہ تعلقات عامہ آکھیا جو 11/12 اکتوبر 2025 دی رات افغان طالبان اتے بھارت دے حمایت یافتہ فتنہ الخوارج پاکستان تے بلا اشتعال حملہ کیتا، ایں بزدلانہ حملے دے خلاف وطن دے دفاع اتے سلامتی اچ 23 بہادر جوان شہید تھیے جݙاں جو مؤثر جوابی کارروائی اچ 200 توں ودھ طالبان اتے ایں نال جُڑے دہشت گرد ہلاک تھیے۔ اتوار کوں آئی ایس پی آر ولوں جاری اعلامیے دے مطابق 11 اتے 12 دی رات اے حملہ سرحدی علاقیاں کوں غیر مستحکم کرݨ اتے دہشت گردی کوں فروغ ݙیوݨ کیتے کیتا ڳیا تاںجو فتنہ الخوارج دے خراب ارادیاں کوں طاقت مِلے۔ آپݨے دفاع دے حق کوں استعمال کریندیں ہوئیں پاکستان دی چوکس مسلح افواج سرحد دے نال نال ایں حملے کوں فیصلہ کن طور تے ناکام بݨایا اتے طالبان فورسز اتے انہاں نال وابستہ خوارج دا بھاری جانی نقصان کیتا۔ فائرنگ اتے حملیاں دے نال نال چھاپے مار تے طالبان دے کیمپاں، دہشت گرداں دیاں تربیتی تنصیبات اتے افغان سرزمین توں آپریٹ کرݨ آلے سہولتی نیٹ ورکس کوں نشانہ بݨایا ڳیا، جنہاں اچ فتنہ الخوارج، فتنہ الہندوستان اتے آئی ایس کے پی اتے داعش نال منسلک عنصری شامل ہن۔ شہریاں دی جاناں دی حفاظت اتے غیر ضروری نقصان توں بچݨ کیتے سارے ممکنہ اقدامات کیتے ڳئے۔ آئی ایس پی آر دے مطابق انہاں آپریشنز دے نتیجے اچ سرحد دے نال نال بہوں سارے طالبان دے ٹکاݨے تباہ کر ݙتے ڳئے۔ افغان سرحد دے پار 21 دشمن چوکیاں تے قبضہ کیتا ڳیا اتے پاکستان دے خلاف حملیاں دی منصوبہ بندی اتے سہولت کاری کیتے استعمال تھیوݨ آلے بہوں سارے دہشت گرد تربیتی کیمپ ناکارہ کر ݙتے ڳئے۔ رات دی جھڑپاں دے دوران 23 بہادر پاکستانی جواناں آپݨے پیارے وطن دی علاقائی سلامتی دا دفاع کریندیں ہوئیں شہادت کوں ڳل لاتا جݙاں جو 29 فوجی زخمی تھیے۔ قابل اعتماد انٹیلی جنس تخمینیاں اتے نقصاناں دے جائزے دے مطابق، 200 توں ودھ طالبان اتے انہاں نال وابستہ دہشت گرد ہلاک کیتے ڳئے، جݙاں جو زخمیاں دی تعداد ایں توں بہوں ودھ اے۔ آئی ایس پی آر دے مطابق طالبان دی چوکیاں، کیمپاں، ہیڈکوارٹراں اتے دہشت گرداں دے سہولتی نیٹ ورکس کوں سرحد دے نال نال وݙے پیمانے تے نقصان پڄایا ڳیا۔ آئی ایس پی آر آکھیا جو پاکستان دی مسلح افواج پاکستان دی علاقائی سلامتی، عوام دی جان و مال دی حفاظت کیتے ہر ویلھے تیار ہن۔ اساݙا عزم اے جو اساں پاکستان دی علاقائی سلامتی دا دفاع کریسوں اتے جو اساݙی سلامتی کوں خطرہ ݙیسن، انہاں کوں شکست ݙیسوں۔ آئی ایس پی آر دے مطابق اگرچہ پاکستان دے عوام تشدد اتے جارحیت دی بجائے تعمیری سفارت کاری اتے مذاکرات کوں ترجیح ݙیندن، پر اساں افغان سرزمین کوں پاکستان دے خلاف دہشت گردی کیتے استعمال کرݨ دی غداری برداشت نہ کریسوں۔ آئی ایس پی آر آکھیا جو اساں کوں تشویش اے جو اے سنگین اشتعال انگیزی طالبان دے وزیر خارجہ دے بھارت دے دورے دے دوران تھئی، جو خطے اچ دہشت گردی دا سَب توں وݙا سرپرست اے۔ خطے دے امن اتے سلامتی دے مفاد اچ اساں طالبان حکومت توں مطالبہ کریندوں جو او آپݨی سرزمین توں آپریٹ کرݨ آلے دہشت گرد گروہاں، خاص طور تے فتنہ الخوارج، فتنہ الہندوستان اتے آئی ایس کے پی و داعش دے خلاف فوری اتے قابل تصدیق اقدامات کرے۔ ٻئی صورت اچ پاکستان آپݨی عوام دے دفاع دے حق کوں استعمال کریندیں ہوئیں دہشت گردی دے اہداف کوں مسلسل ناکارہ بݨیندا رہسی۔ آئی ایس پی آر دے مطابق طالبان حکومت کوں کوئی غلط فہمی نہ رکھیندیں ہوئیں افغان عوام دی فلاح، امن، خوشحالی اتے ترقی کوں غیر ذمہ دارانہ تلوار چلئیے تے ترجیح ݙیوݨی چاہیدی اے۔ گزریل رات دا واقعہ پاکستان دے ایں لمبے عرصے توں قائم موقف دی تصدیق کریندے جو طالبان حکومت فعال طور تے دہشت گرداں دی سہولت کاری کریندی پئی اے۔ آئی ایس پی آر خبردار کیتا جو اگر طالبان حکومت بھارت دے نال رَل تے خطے کوں غیر مستحکم کرݨ دے گھٹ ویلھے دے مقصداں کیتے دہشت گرد تنظیماں دی سرپرستی جاری رکھیندی اے تاں پاکستان دی عوام اتے ریاست اوں ویلھے تئیں چین نال نہ بہسن جݙاں تئیں جو افغانستان توں نکلݨ آلی دہشت گردی دی لعنت کوں مکمل طور تے ختم نہ کر ݙتا ونڄے۔