وزیراعظم شہباز شریف دا افغانستان دی اشتعال انگیزی دے جواب اچ مؤثر کارروائی تے پاک فوج کوں خراج تحسین، شہید تھیوݨ آلے سکیورٹی فورسز دے 23 جواناں کوں خراج عقیدت

اسلام آباد۔12اکتوبر (اے پی پی) وزیراعظم محمد شہباز شریف افغانستان دی اشتعال انگیزی دے جواب اچ پاکستان ولوں بھرپور اتے مؤثر کارروائی اتے پاکستان تے حملیاں اچ ملوث افغانستان اچ موجود دہشت گرداں دے ٹکاݨیاں کوں کامیابی نال نشانہ بݨاوݨ تے پاک افواج کوں خراج تحسین پیش کریندیں ہوئیں شہید تھیوݨ آلے سکیورٹی فورسز دے 23 جواناں کوں خراج عقیدت پیش کیتا۔ وزیرِ اعظم آفس دے میڈیا ونگ توں اتوار کوں جاری بیان موجب وزیراعظم انہاں کامیاب کارروائیاں اچ شہید تھیوݨ آلے سکیورٹی فورسز دے 23 جواناں کوں خراج عقیدت پیش کیتا اتے شہیداں دے درجات دی بلندی کیتے دعا کیتی اتے انہاں دے خاندان نال تعزیت کیتی۔ وزیراعظم شہباز شریف دہشت گرداں دے خلاف کارروائیاں اچ زخمی تھیوݨ آلے سکیورٹی فورسز دے جواناں دی جلدی صحت یابی کیتے وی دعا کیتی۔ وزیراعظم آکھیا جو پاک افواج دی پیشہ ورانہ مہارت تے فخر اے، پاکستان دے دفاع تے کوئی سمجھوتہ نہ تھیسی اتے ہر اشتعال انگیزی دا بھرپور اتے مؤثر جواب ݙتا ویسی۔ وزیراعظم آکھیا جو پاک فوج ہمیشہ ہر طرح دی بیرونی جارحیت دا مُنہ توڑ جواب ݙتے، پوری قوم پاکستان دی سکیورٹی فورسز دے نال کھڑی اے، وزیراعظم آکھیا جو پاکستان کئی واری افغانستان کوں اُتھاں موجود فتنہ الخوارج اتے فتنۃ الہندوستان جیڑھے دہشت گرد عنصراں دے بارے اچ معلومات ݙتین، جو افغانستان دی سرزمین توں پاکستان دے خلاف کارروائیاں کریندے پئن۔ وزیراعظم آکھیا جو دہشت گرد تنظیماں کوں افغانستان اچ موجود عناصر دی حمایت حاصل اے، وزیراعظم آکھیا جو پاکستان توقع کریندے جو افغان حکومت ایں امر کوں یقینی بݨیسی جو ایں دی سرزمین پاکستان دے خلاف دہشت گرداں دے استعمال اچ نہ آوے۔