ملک کوں امن، استحکام اتے معاشی بحالی دی لوڑھ، دشمن انتشار کھنݙاوݨ دی سازش دی سہولت کاری کریندا پئے، وفاقی وزیر پروفیسر احسن اقبال

اسلام آباد۔13اکتوبر (اے پی پی) وفاقی وزیر برائے منصوبہ بندی، ترقی، اصلاحات تے خصوصی اقدامات پروفیسر احسن اقبال آکھیا جو پاکستان اچ انتشار کھنݙاوݨ دی سازش دی سہولت کاری تھیندی پئی اے، ایں ویلھے ملک کوں امن، استحکام اتے معاشی بحالی دی لوڑھ اے، امن کوں نقصان پڄاوݨ آلے عنصری قبول نئی ۔ سنوار کوں ’’ایکس‘‘ تے آپݨی پوسٹ اچ انہاں آکھیا جو غزہ اچ مکمل جنگ بندی اتے امن دے بعد جݙاں فلسطینی خوشی اچ ہن اتے انہاں دی عسکری تنظیم وی امن معاہدہ کیتے، ایہو جیہے نازک ویلھے اچ کہیں مذہبی گروہ ولوں ݙو سال تئیں سُتے پئے لوکاں کوں جذباتی نعرے لا تے اکساوݨ اتے اسلام آباد مارچ دی کالاں ݙیوݨ واضح طور تے انتشار کھنݙاوݨ دی سازش اے، اے حرکتاں آخرکار ٻاہرلے تے اندرونی دشمنان دی سہولت کاری دے برابر ہن۔ پروفیسر احسن اقبال زور ݙتا جو اج پاکستان کوں امن، استحکام اتے معاشی بحالی دی بہوں لوڑھ اے، ایں ویلھے جو وی عنصری پاکستان دے امن اتے استحکام دے نال کھیݙدن او درحقیقت قومی مفاد دے خلاف کَم کریندے پئن اتے انہاں کوں کہیں وی صورت برداشت نہ کیتا ویسی۔ وفاقی وزیر عوام توں اپیل کیتی جو او انتشار کھنݙاوݨ آلی کہیں وی سرگرمی اچ حصہ نہ گھنن اتے ریاستی اداریاں دے نال تعاون کرن تاں جو ملک دا امن تے استحکام برقرار رہ سڳے۔ انہاں آکھیا جو صورتِ حال دا چنڳی طرح جائزہ ڳھدا ویندا پئے اتے متعلقہ ادارے قانون تے آئین دے تحت کارروائی کوں یقینی بݨیسن تاںجو عوامی امن تے سلامتی اچ خلل سٹݨ آلے عنصراں کوں بے نقاب کر تے روکیا ونڄ سڳے۔