پاکستان، ترکیہ اتے آذربائیجان دی دوستی سدا بہار اے، سکیورٹی، تجارت، تعلیم، ٹیکنالوجی اتے ثقافت دے میداناں اچ تعاون نال انقرہ توں اسلام آباد اتے باکو تئیں اعتماد، احترام، رَل تے سوچݨ دا مضبوط پُل ٻݨا سڳدوں، چیئرمین سینیٹ

اسلام آباد۔13اکتوبر (اے پی پی) چیئرمین سینیٹ سید یوسف رضا گیلانی آکھیا جو پاکستان، ترکیہ اتے آذربائیجان دی دوستی سدا بہار اے، سکیورٹی، تجارت، تعلیم، ٹیکنالوجی اتے ثقافت دے میداناں اچ تعاون نال انقرہ توں اسلام آباد اتے باکو تئیں اعتماد، احترام، رَل تے سوچݨ دا مضبوط پُل ٻݨا سڳدن۔ اے ڳالھیں انہاں سنوار کوں اتھاں ترائے فریقاں دے سپیکرز اجلاس دے افتتاحی سیشن نال خطاب کریندیں ہوئیں کیتا۔ چیئرمین سینیٹ ایں کانفرنس دے انعقاد تے سپیکر قومی اسمبلی سردار ایاز صادق دا شکریہ ادا کیتا اتے آکھیا جو سپیکر قومی اسمبلی ایں اہم ویلھے اچ برادر ملکاں کوں ہک پلیٹ فارم تے جمع کیتا اے۔ چیئرمین سینیٹ اجلاس دے موضوع کوں بہوں اہم قرار ݙیندیں ہوئیں آکھیا جو بطور پارلیمنٹیرین اے موضوع انہاں دے دل دے نیڑے اے۔ انہاں آکھیا جو آذربائیجان، پاکستان اتے ترکیہ مشترکہ قدراں، اتحاد دے مضبوط رشتے اچ جڑیے ہوئن۔ انہاں آکھیا جو بطور وزیراعظم پاکستان ترکیہ اتے آذربائیجان دے رہنماواں نال ملاقاتاں دا شرف حاصل تھیا، ترکیہ ہک ایہو جیہا ملک اے جو آپݨے ماضی تے فخر کریندے اتے آپݨے مستقبل تے یقین رکھیندے، آذربائیجان مشکلات دے بعد آپݨی سرزمین کوں ترقی تے تعمیر دی نشانی بݨا ݙتا۔ انہاں آکھیا جو پاکستان، ترکیہ اتے آذربائیجان دی دوستی سدا بہار اے، وقتی لوڑھ نئی بلکہ ہک عقیدے تے مبنی اخوت اے جو جنگاں، پابندیاں اتے عالمی تبدیلیاں دے باوجود اساݙا دوستی اتے بھائی چارے دا رشتہ قائم اے، ترائے ملکاں ہمیشہ ہک ݙوجھے دے وقار اتے خودمختاری دے احترام کوں پہلے رکھیے، ترائے ملکاں اوکھے ویلھے اچ ہک ݙوجھے دا ساتھ ݙتا، ہک ݙوجھے دے موقف دی تائید کیتی اے۔ چیئرمین سینیٹ آکھیا جو مسلم دنیا ایں ویلھے فلسطین، کشمیر اتے ݙوجھے علاقیاں اچ ناانصافی اتے ظلم دے امتحان توں لنگھدی پئی اے، انہاں حالات اچ پارلیمانی اداریاں کوں بصیرت اتے جرات دے مراکز بݨݨا پوسی، اے ترائے فریقاں دا فورم صرف ہک سفارتی سرگرمی نئی بلکہ اساݙے مشترکہ قدراں دا عملی اظہار اے۔ چیئرمین سینیٹ آکھیا جو سکیورٹی، تجارت، تعلیم، ٹیکنالوجی اتے ثقافت دے میداناں اچ تعاون نال انقرہ توں اسلام آباد اتے باکو تئیں اعتماد، احترام، رَل تے سوچݨ دا مضبوط پُل تعمیر کر سڳدن، نومبر اچ اسلام آباد اچ ’’بین الپارلیمانی سپیکرز کانفرنس‘‘ دے انعقاد دی تیاری دے تناظر اچ اے اجلاس پارلیمانی سفارت کاری دے ہک نویں باب دا آغاز اے، امن، ترقی اتے خوشحالی کیتے اساݙا عزم عالمی غیر یقینی حالات دے باوجود مضبوط اے، امن اتے خوشحالی منزل نئی بلکہ ہک سفر اے، ایں پندھ اچ اساں نال نال ہن۔ انہاں عزم ظاہر کیتا جو پاکستان، ترکیہ اتے آذربائیجان آپݨے تعلقات کوں ٻیا مضبوط بݨیسن۔ انہاں امید ظاہر کیتی جو ایں اہم اجلاس دی وجہ نال عوامی رابطیاں کوں فروغ ݙیوݨ اتے ترقی کیتے رَل تے کَم کرݨ کیتے تجویزاں سامݨے آسن۔