پاکستان ریلوے دا 35 ارب روپے دا منصوبہ، ٹریناں اتے پٹڑیاں دی حفاظت کیتے وݙے اقدامات

اسلام آباد۔13اکتوبر(اے پی پی(پاکستان ریلوے ملک اچ ریل گاݙیاں دی حفاظت اتے نظام کوں نویں خطوط تے استوار کرݨ کیتے تقریباً 35 ارب روپے مالیت دے ٻہوں سارے وݙے انفراسٹرکچر اتے سیفٹی منصوبے لاگو کریندا پئے۔ ویلتھ پاکستان کوں مِلݨ آلیاں سرکاری دستاویزت موجب اے منصوبے پٹڑیاں دی مرمت و بحالی، کمزور پُلاں دی مضبوطی اتے جدید انسپکشن نظام دی تنصیب تے مشتمل ہن تاں جو ریل گاݙیاں دی محفوظ اتے قابلِ اعتماد آونڄ کوں یقینی بݨایا ونڄ سڳے۔دستاویزات موجب ریلوے نیٹ ورک دے کئی اہم سیکشنز اچ پٹڑیاں دی حفاظت نال متعلق تعمیراتی کَم جاری ہن جنہاں اچ روہڑی-خانپور، ٹنڈو آدم-روہڑی، کیماڑی-حیدرآباد، خانیوال-شاندار،روہڑی-سبی اتے شیرشاہ-کنڈیان سیکشن شامل ہن۔ انہاں منصوبیں دی کُل لاڳت 31,829.9 ملین روپے اے، انہاں دا مقصد پٹڑیاں دی جسمانی حالت کوں بہتر بݨاوݨا، آپریشنل اعتماد بحال رکھݨا اتے انہاں اہم ریلوے سیکشنز اچ محفوظ و ہموار ٹرین آپریشن کوں یقینی بݨاوݨا اے۔ ایں دے علاوہ کوٹری، اخوند آباد اتے دادو وچال پٹڑیاں دی بحالی دا ہک وکھرا منصوبہ وی جاری اے جیں کیتے 2,321 ملین روپے رکھئے ڳئن، اے منصوبہ انہاں اہم حصیں دی بحالی اتے مضبوطی کیتے ترتیب ݙتا ڳئے جنہاں کوں ویلھے دے نال نقصان یا کمزوری دا سامݨا رہیے۔ ریلوے پُلاں دی مضبوطی وی حفاظتی پروگرام دا ہک ضروری حصہ اے، کمزور پُلاں کوں مستحکم بݨاوݨ کیتے تقریباً 980 ملین روپے رکھیے ڳئن۔ ایں اقدام دا مقصد پُلاں دی ساختی مضبوطی کوں یقینی بݨاوݨا اے تاں جو مسافراں اتے مال بردار گاݙیاں دی محفوظ نقل و حرکت برقرار رکھی ونڄ سڳے