ترکیہ اتے آذربائیجان دے اعلیٰ سطحی پارلیمانی وفد دا این ڈی ایم اے دے نیشنل ایمرجنسیز آپریشن سینٹر دا دورہ

اسلام آباد۔13اکتوبر(اے پی پی( ترکیہ اتے آذربائیجان دی پارلیمان دے سپیکرز دی قیادت اچ مشترکہ وفد این ڈی ایم اے دے نیشنل ایمرجنسیز آپریشنز سینٹر (این ای او سی) دا دورہ کیتا۔ ترکیہ دی گرینڈ نیشنل اسمبلی دے سپیکر پروفیسر ڈاکٹر نعمان کرتلمش اتے آذربائیجان دی ملی مجلس دی سپیکر صاحبا غفوروا وفد دی قیادت کیتی۔ این ای او سی دے دورے دے موقع تے پاکستان دے قومی اسمبلی دے سپیکر سردار ایاز صادق وفد دے نال موجود ہن۔ ترکیہ، آذربائیجان اتے پاکستان دے ارکانِ پارلیمان تے مشتمل 40 رکنی وفد این ڈی ایم اے ہیڈ کوارٹرز دا تفصیلی دورہ کیتا۔چیئرمین این ڈی ایم اے لیفٹیننٹ جنرل انعام حیدر ملک وفد کوں پاکستان دے فعال ڈیزاسٹر مینجمنٹ فریم ورک تے بریفنگ ݙتی۔ چیئرمین این ڈی ایم اے ادارے دے مرکزی کردار، جدید ٹیکنالوجی دے استعمال اتے ویلھے سِر پیشگی خبر ݙیوݨ دے نظام دے حوالے نال ارکان کوں ݙسایا۔ وفد کوں این ڈی ایم اے دیاں علاقائی تعاون ودھاوݨ دیاں کوششاں، معلومات دے تبادلیں، تربیتی ورکشاپاں اتے بین الاقوامی مشقاں دے بارے اچ وی آگاہ کیتا ڳئے۔ چیئرمین این ڈی ایم اے ساوݨ 2025 دے دوران کامیاب آپریشنز، ویلھے توں پہلے خبر ݙیوݨ دے نظام اتے 30 لکھ توں ودھ لوکاں دے وقتی انخلاء تے بریفنگ ݙتی۔ این ڈی ایم اے متاثرہ علاقیں اچ ریسکیو، ریلیف اتے بحالی دیاں رَلیاں مِلیاں کارروائیاں کوں مؤثر انداز اچ پورا کیتا۔ ترکیہ اتے آذربائیجان دے وفد این ڈی ایم اے دے جدید ٹیکنالوجی دے استعمال اتے قومی استعداد ودھاوݨ دے عزم دی تعریف کیتی ۔ ݙوہیں ملکاں پاکستان دے نال ڈیزاسٹر رسک ریڈکشن، صلاحیت اچ ودھارا اتے آپت دے تعاون دے ودھارے دے عزم کوں ول دُہرایا۔ ترائے بھرا ملک ماحولیاتی تبدیلی اتے قدرتی آفتاں دے سانجھے چیلنجز نال نبݨݨ کیتے ہک مٹھ ہن۔ اے تعاون خطے اچ محفوظ، مستحکم اتے آپت دی فلاح تے مبنی مستقبل دے پاسے ہک اہم قدم اے۔