فلسطینی عوام دی آزادی، عزت اتے خوشحالی پاکستان دی بنیادی ترجیح اے، وزیراعظم شہباز شریف

شرم الشیخ۔14اکتوبر (اے پی پی) وزیراعظم محمد شہباز شریف آکھیا جو فلسطینی عوام دی آزادی، عزت اتے خوشحالی پاکستان دی بنیادی ترجیح اے، 1967ء توں پہلے دی حداں دے مطابق ہک مضبوط اتے چل سڳݨ آلی فلسطینی ریاست دا قیام جئیں دا دارالحکومت القدس الشریف ہووے، پاکستان دی مشرق وسطیٰ پالیسی دی بنیاد رہیے اتے رہسی۔ شرم الشیخ اچ غزہ امن سربراہ اجلاس اچ شرکت دے بعد وطن واپسی توں پہلے سماجی رابطے دے پلیٹ فارم ’’ایکس‘‘ تے ہک پوسٹ اچ وزیراعظم آکھیا جو او شرم الشیخ اچ غزہ امن سربراہ اجلاس اچ شرکت دے بعد وطن واپسی کیتے ہوائی جہاز تے سوار تھیندے پئن اتے ممکنہ طور تے ایں وݙی پیش رفت دی نوعیت دے بارے اچ آپݨے کُجھ تاثرات ݙساوݨ چاہندن جو اے کیویں ممکن تھیا اتے پاکستان دا کیوں ایں نال بہوں گہرا تعلق رہیے۔ وزیراعظم آکھیا جو پاکستان دی سَب توں اہم ترجیح غزہ اچ نسل کشی دی مہم کوں فوری طور تے روکݨ ہائی، ݙوجھے برادر ملکاں دے نال رَل مِل تے ایں ترجیح کوں تسلسل نال بیان کیتا ڳیا اتے مضبوط کیتا ڳیا۔ وزیراعظم آکھیا جو صدر ٹرمپ کیتے اساݙا شکریہ ایں ڳالھ دی بناء تے اے جو او ایں کوں روکیسن اتے ایں وعدے کوں پورا کریسن۔ وزیراعظم آکھیا جو اساں امن کیتے صدر ٹرمپ دے منفرد کردار دی تعریف کریندے راہسوں، فلسطینی عوام دی آزادی، وقار اتے خوشحالی پاکستان کیتے بنیادی اہمیت دی حامل اے۔ وزیراعظم آکھیا جو انشاء اللہ 1967ء توں پہلے دی حداں دی بنیاد تے جئیں دا دارالحکومت القدس الشریف ہووے، ہک مضبوط اتے چل سڳݨ آلی فلسطینی ریاست دا قیام پاکستان دی مشرق وسطیٰ دی پالیسی دی بنیاد اے اتے رہسی۔-