صدر مملکت دا افغان سرزمین توں سرحد پار حملیاں دی مذمت

اسلام آباد۔15اکتوبر (اے پی پی) صدر مملکت آصف علی زرداری افغان سرزمین توں سرحد پار حملیاں دی سخت مذمت کریندیں ہوئیں آکھیا جو افغان علاقے توں حملے پاکستان دی خودمختاری دی کُھلّی خلاف ورزی ہن۔ ایوان صدر دے پریس ونگ توں بُدھ کوں جاری بیان موجب صدر مملکت مسلح افواج دی جرأت اتے پیشہ ورانہ مہارت کوں خراج تحسین پیش کیتا اتے آکھیا جو افغان طالبان حکومت دوحہ معاہدے دی مسلسل خلاف ورزی کریندی پئی اے۔ انہاں آکھیا جو افغان طالبان دہشت گرداں کوں محفوظ پناہ گاہواں ݙیندے پئن جو خطے دے ملکاں کیتے خطرہ بݨدے پئن، ایہو سویں اقدامات پورے خطے بشمول پاکستان کوں غیر مستحکم کریندے پئن۔ صدر مملکت آکھیا جو افغان حکومت وسیع البنیاد نمائندہ حکومت دے قیام دے وعدے توں مُکردی پئی اے۔ افغان طالبان اقتدار تے اجارہ داری قائم کر رکھی اے۔ صدر آصف علی زرداری آکھیا جو پاک فوج سپن بولدک اتے کرم سیکٹر اچ حملے موثر انداز اچ پِچھوں ہٹائے۔ انہاں آکھیا جو افغان حکام آپݨی سرزمین دہشت گردی اتے پاکستان مخالف سرگرمیاں کیتے استعمال نہ تھیوݨ ݙیون، ایہو سویں حملے خطے دے امن اتے دوستی دے تعلقات کوں نقصان ݙیندن۔ انہاں آکھیا جو پاکستان سارے ہمسایہ ملکاں نال پرامن اتے تعاون تے مبنی تعلقات چاہندے، پاکستان دے خلاف کہیں وی جارحیت دا بھرپور اتے ݙو ٹُوک جواب ݙتا ویسی۔