صدر مملکت آصف علی زرداری نال رومانیہ کیتے پاکستان دے نامزد سفیر الیاس محمود نظامی دی ملاقات

اسلام آباد۔15اکتوبر(اے پی پی)صدر مملکت آصف علی زرداری نال رومانیہ کیتے پاکستان دے نامزد سفیر الیاس محمود نظامی ایوان صدر اچ ملاقات کیتی۔ ایوان صدر دے پریس ونگ توں جاری بیان موجب صدر مملکت الیاس محمود نظامی کوں رومانیہ اچ پاکستان دا سفیر نامزد تھیوݨ تے مبارخ ݙیندے آکھیا جو اڄوکے سال پاکستان اتے رومانیہ وچال سفارتی تعلقات دے قیام دی 60 ویں سالگنڈھ منائی ویندی پئی اے۔ صدر آصف علی زرداری تجارت، سرمایہ کاری، ثقافت اتے عوامی رابطےاچ تعاون دے ودھارے تے زور ݙیندے نامزد سفیر کوں ہدایت کیتی جو او معاشی سفارت کاری کوں ترجیح ݙیون تاں جو ݙو طرفہ تجارت اچ ودھارا تھی سڳے۔ صدرمملکت قابل تجدید توانائی، ٹیکنالوجی اتے زراعت دے شعبیں اچ موقع لبھݨ تے زورݙتا۔ صدر مملکت 2025ء دے تجارتی و اقتصادی تعاون دے معاہدے تے موثر عملدرآمد دی اہمیت تے زور ݙیندے آکھیا جو پاکستان اتے رومانیہ وچال کاروباری رابطے دے ودھارے نال آپت دے تعلقات مزید تکڑے تھیسن۔ صدرآصف علی زرداری پاکستانی ثقافت، فن اتے ورثے کوں اُجاگر کرݨ اتے سمندر پار پاکستانیاں دے نال رابطے ودھاوݨ دی لوڑھ تے وی زور ݙتا۔