نوابزادہ لیاقت علی خان آپݨی نہ تھکݨ آلی محنت، دیانتداری اتے بصیرت نال قوم دی خدمت کیتی، سید یوسف رضا گیلانی

اسلام آباد۔16اکتوبر(اے پی پی) چیئرمین سینیٹ سید یوسف رضا گیلانی آکھیے جو نوابزادہ لیاقت علی خان بانیِ پاکستان قائداعظم محمد علی جناحؒ دے مخلص ساتھی، عظیم رہنما اتے سچے محبِ وطن ہن جنہاں قیامِ پاکستان دے فوراً بعد نویں بݨی ہوئی ریاست دی تعمیر و استحکام کیتے تاریخی کردار ادا کیتا۔ سینیٹ سیکرٹریٹ توں جاری بیان موجب ملک دے پہلے وزیرِاعظم شہیدِ ملت نوابزادہ لیاقت علی خان دے 74ویں ورھیݨے دے موقع تے انہاں دی خدمات کوں خراجِ عقیدت پیش کریندے چیئرمین سینیٹ آکھیا جو نوابزادہ لیاقت علی خان آپݨی نہ تھکݨ آلی محنت، دیانتداری اتے بصیرت نال قوم دی خدمت کیتی اتے پاکستان دے سیاسی، معاشی اتے سفارتی استحکام دی بنیاد رکھی۔ انہاں آکھیا جو شہیدِ ملت ملکی مفاد، جمہوریت اتے قومی یکجہتی کوں ہمیشہ اڳوں رکھیا اتے آپݨی جان ایں عظیم مقصد تے نچھاور کرݙتی۔ سید یوسف رضا گیلانی آکھیا جو لیاقت علی خان دی شہادت تاریخ دا ہک المناک باب اے مگر انہاں دے نظریات، عزم اتے جدوجہد اج وی اساݙے کیتے مشعلِ رَاہ ہن۔ انہاں آکھیا جو اساکوں بطورِ قوم شہیدِ ملت دے خیالات کوں مشعلِ رَاہ بݨا تے ملک اچ اتحاد، عدل، اتے جمہوری روایات دے ودھارے کیتے جدوجہد جاری رکھݨی چاہیدی اے۔ چیئرمین سینیٹ آکھیا جو پاکستان دے سیاسی رہنماواں، عوام اتے نویں نسل کوں نوابزادہ لیاقت علی خان جیھے رہنماواں دے کردار توں رہنمائی حاصل کریندے ملک و قوم دی تعمیر و ترقی کیتے ہک تھیوݨا چاہیدے۔ انہاں دعا کیتی جو اللہ تعالیٰ شہیدِ ملت نوابزادہ لیاقت علی خان دے درجات اُچے فرماون اتے اساکوں انہاں دے اصولاں اتے مشن تے عمل کرݨ دی توفیق عطا فرماون۔