وفاقی وزیر پروفیسر احسن اقبال نال امریکی ناظم الامور نیٹلی بیکر دی ملاقات

اسلام آباد۔16اکتوبر (اے پی پی)وفاقی وزیر منصوبہ بندی، ترقی و خصوصی اقدامات پروفیسر احسن اقبال نال پاکستان اچ امریکی ناظم الامور نیٹلی بیکر ملاقات کیتی جیں اچ پاکستان اتے امریکا وچال مختلف ترقیاتی شعبیں اچ ݙوپاسے تعاون کوں مزید ودھاوݨ دے امکانات تے ڳالھ مہاڑکیتی ڳئی۔ ملاقات اچ پروفیسراحسن اقبال امریکا۔پاکستان نالج کوریڈور کوں ول فعال کرݨ اتے ایں کوں وسعت ݙیوݨ دی لوڑھ تے زور ݙتا تاں جو پاکستانی سکالرز اتے ماہرین کوں امریکا دیاں نامور یونیورسٹیاں اچ اعلیٰ تعلیم اتے تحقیق دے مزید موقع ݙتے ونڄ سڳن۔ انہاں آکھیا جو ایہو جیھے پروگرام پاکستان دے انسانی سرمائے دی ترقی اتے اختراعی معیشت دے ودھارے کیتے ٻہوں اہم ہن۔ وفاقی وزیر ٹیکنالوجی، زراعت، معدنیات اتے ماحولیاتی تبدیلی جیھے شعبیں اچ تعاون ودھاوݨ دی لوڑھ تے وی زور ݙتا جیڑھے پاکستان دی پائیدار ترقی اتے مستقبل دی مسابقت کیتے اہم اہمیت رکھیندن۔ انہاں تعلیم، سائنس اتے ٹیکنالوجی تے ݙو طرفہ ڳالھ مہاڑ فورم ول فعال کرݨ دی لوڑھ تے وی زور ݙتا تاں جو ݙوہیں ملکاں وچال ادارہ جاتی تعاون، مشترکہ تحقیق اتے اکیڈمک و سائنسی رابطیں کوں ودھارا ݙتا ونڄ سڳے۔ پروفیسر احسن اقبال آکھیا جو پاکستان اتے امریکا دا تعلیم، سائنس اتے ترقی دے میداناں اچ تعاون دا ہک لمبا اتے کامیاب ماضی اے، انہاں شراکت داراں کوں سانجھی ترقی دے نویں وژن دے تحت بحال کرݨ اساݙی نویں نسل کوں 21ویں صدی دے چیلنجز اتے موقعیں کیتے تیار کریسی۔ ݙوہیں فریقین پاکستان۔امریکا شراکت کوں مزید تکڑا بݨاوݨ اتے سانجھی خوشحالی، علم دے تبادلے اتے پائیدار ترقی کیتے رَل تے کَم کرݨ دا عزم کیتا۔