وفاقی وزیراطلاعات عطاء اللہ تارڑ ایپنک دے نویں منتخب تھیوݨ آلے عہدیداراں توں انہاں دے عہدے دا حلف ڳھدا

اسلام آباد۔16اکتوبر(اے پی پی ) وفاقی وزیرِاطلاعات و نشریات عطاء اللہ تارڑ آل پاکستان نیوز پیپرز اینڈ الیکٹرانک میڈیا ایمپلائیز کنفیڈریشن (ایپنک) دے نویں منتخب تھیوݨ آلے چیئرمین محمد صدیق انظر سودھے ݙوجھے عہدیداراں کوں مبارخ ݙیندے انہاں توں عہدے دا حلف ڳھدا اتے صحافیاں دے حقوق کیتے ہر ممکن تعاون دا یقین ݙیوائے۔گزریل ݙینھ انفارمیشن سروس اکیڈمی اسلام آباد اچ ایپنک دے نویں منتخب تھیوݨ آلے عہدیداراں دی حلف برداری دی تقریب دا اہتمام کیتا ڳیا جیں اچ وفاقی وزیر اطلاعات عطاء اللہ تارڑ، چیئرمین اسٹینڈنگ کمیٹی وزارت دفاع سینیٹر محمد طلحہ محمود، شام دے سفیر رامز العری، ایگزیکٹیو ڈائریکٹر جنرل انفارمیشن سروسز اکیڈمی عمرانہ وزیر، ایگزیکٹیو ڈائریکٹر جنرل/ پی آئی او مبشر حسن، ڈائریکٹر خواجہ معاذ، ڈائریکٹر زوبیہ، ڈائریکٹر فیڈرل ہاؤسنگ فاؤنڈیشن عمر سیال، پی ایف یو جے (دستور) دے صدر حاجی محمد نواز رضا، پی ایف یوجے (ورکر) دی صدر ڈاکٹر سعدیہ کمال، پی ایف یوجے (رانا عظیم) دی نائب صدر فرحت فاطمہ، نایاب لیب دے سی ای او ڈاکٹر ظہیر الدین شیخ سودھے اہم سیاسی و سماجی اتے صحافتی شخصیات شرکت کیتی۔ وفاقی وزیرِ اطلاعات عطا اللہ تارڑ آپݨے خطاب اچ آکھیا جو حکومت آزادیِ اظہارِ رائے اتے ذمہ دارانہ صحافت تے پکا یقین رکھیندی اے۔ میڈیا اتے حکومت دا تعلق شراکت داری دا اے، تصادم دا کائنی۔ اساں صحافت دے ودھارے کیتے ہر ممکن تعاون جاری رکھیسوں۔ انہاں نویں منتخب تھیوݨ آلے عہدیداراں کوں مبارخ ݙیندے امید ظاہر کیتی جو او میڈیا انڈسٹری دے مسئلیں دے حل اتے صحافتی معیار کوں بہتر بݨاوݨ اچ مؤثر کردار ادا کریسن۔ انہاں عالمی سطح تے پاکستان دیاں کامیابیاں دا وی ذکر کیتا اتے اسرائیل و فلسطین وچال امن معاہدے کیتے پاکستان دیاں کوششاں دا وی حوالہ ݙتا۔ انہاں دا آکھݨ ہئی جو امریکی صدر دی طرفوں پاکستان دی تعریف اساݙی حکومت دی کارکردگی دا مُنہ ٻولیندا ثبوت اے۔ تقریب دے چھیکڑ تے وزیرِ اطلاعات بہترین کارکردگی دا مظاہرہ کرݨ آلے صحافیاں اتے اہم شخصیات کوں ایپنک دی طرفوں ایوارڈز وی ݙتے تے ایپنک دی نویں قیادت دے نال گروپ فوٹو بݨوایا۔ ایں موقع تے خصوصی تقریب دا وی انعقاد کیتا ڳیا جیں اچ سینیٹر طلحہ محمود بطورِ مہمان خصوصی شرکت کیتی اتے نویں منتخب تھیوݨ آلے عہدیداراں کوں مبارخ ݙیندے صحافیاں اتے میڈیا ورکرز دے حقوقِ کیتے کَم کرݨ تے ایپنک عہدیداراں کوں خراج تحسین پیش کیتا اتے آپݨے مکمل تعاون دا اعادہ کیتا۔ ایں موقع تے نویں منتخب تھیوݨ آلے چیئرمین صدیق انظر ہک واری ول اعتماد دا اظہار کرݨ تے ملک دے صحافیاں اتے میڈیا ورکرز دا شکریہ ادا کیتا اتے ہمیشہ صحافیاں اتے میڈیا ورکرز دے حقوقِ کیتے جدوجہد جاری رکھݨ دے عزم دا اعادہ کیتا۔