افغانستان توں پاکستان تے حملہ ہندوستان دی شہ تے تھئے، افواج پاکستان حملے دا مُنہ بھن جواب ݙتے، غزہ اچ جنگ بندی اتے خونریزی رُکݨ وݙی کامیابی اے، وزیراعظم شہباز شریف دی وفاقی کابینہ دے اجلاس اچ ڳالھ مہاڑ

اسلام آباد۔16اکتوبر(اے پی پی)وزیراعظم محمد شہباز شریف آکھیے جو افغانستان توں پاکستان تے حملہ ہندوستان دی شہ تے تھئے، افواج پاکستان حملے دا مُنہ بھن جواب ݙتے، پاکستان تے حملہ تھیا تاں افغان وزیر خارجہ دہلی اچ ٻیٹھے ہن، افغانستان دی درخواست تے 48 گھنٹے دی عارضی جنگ بندی دا فیصلہ کیتے، اساں آپݨیاں جائز شرطاں نال افغانستان دے نال ڳالھ مہاڑ سانڳے تیار ہیسے، غزہ اچ جنگ بندی اتے خونریزی دا رُکݨ ٻہوں وݙی کامیابی اے، پاکستان دا موقف ٻہوں واضح اے، فلسطینیاں کوں اقوام متحدہ دیاں قرارداداں موجب حق خود ارادیت ملݨا چاہیدے، غزہ دے معاملے تے سیاست کرݨ آلے ایں ویلھے کتھاں ہن جݙاں اتھاں ڳلیاں محلیں اچ خون وہندا پیا ہئی، پاکستان کشمیری بھیݨ بھراواں کیتے وی آواز چیندا رہسی، آئی ایم ایف دے نال سٹاف لیول معاہدہ تھی ڳئے، اے ہݨ آئی ایم ایف دے نال آخری پروگرام ہووݨا چاہیدے، معرکہ حق دے بعد ملک دا وقار بُلند تھئے، پاکستان اقتصادی طور تے وی مستحکم تھیسی تاں دنیا ایں دے ول ݙیکھسی۔ انہاں اے ڳالھ اتھاں وفاقی کابینہ دے اجلاس اچ آکھی۔ وزیراعظم آکھیا جو افغان حکام کوں کئی واری اے سمجھاوݨ کیتے خلوص نال کوشش کیتی ڳئی جو افغانستان اچ رہݨ آلے کروڑاں لوک اساݙے بھیݨ اتے بھرا ہن، پاکستان اتے افغانستان دی 2 ہزار کلومیٹر لمبی سانجھی سرحد اے، پاکستان خلوص نال محدود وسائل دے باوجود 40 لکھ افغان شہریاں دی پاکستان اچ ݙہاکیں تئیں میزبانی کیتی، اساں بھرپی دے رشتے کوں قائم و دائم رکھیا پر بدقسمتی نال افغانستان توں کارروائیاں دہشت گرد کریندے پئن، انہاں کوں کُھلی چُھٹی اے او نہ صرف پاکستان اچ بے گناہ شہریاں کوں شہید کریندے پئن بلکہ افواج پاکستان، قانون نافذ کرݨ آلے اداریں اتے پولیس دے افسراں اتے جواناں کوں وی شہید کیتے۔ وزیراعظم آکھیا جو اڄوکے واقعیں دے بعد پاکستان دے صبر دا پیمانہ بھر چکئے۔ وزیراعظم آکھیا جو نائب وزیراعظم /وزیر خارجہ کئی واری افغانستان دا دورہ کیتا، وزیر دفاع اتے ݙوجھے حکام وی افغانستان ڳئے اتے افغان حکام دے نال چنڳے طریقے نال ڳالھ مہاڑ کیتی جو اساں ہمسایہ ملک ہیسے اتے اساں ہمسایہ رہݨا اے، معاملیں کوں سانجھے مشورے نال حل کرݨا چاہیدے تاں جو خطے اچ امن اتے ترقی دا دور شروع تھیوے، بدقسمتی نال ساریاں کوششاں دے باوجود افغانستان امن کوں ترجیح نہ ݙتی اتے جارحیت دا رستہ اپنایا۔ انہاں آکھیا جو ہندوستان دی شہ تے پاکستان تے جݙاں حملہ تھیا تاں افغانستان دے وزیرخارجہ دہلی اچ ٻیٹھے ہن ول مجبوراً اساݙی بہادر افواج پاکستان کوں فیلڈ مارشل سید عاصم منیر دی قیادت اچ دفاع دا حق استعمال کریندے مُنہ بھن جواب ݙیوݨا پیا، ایں دے بعد افغانستان جنگ بندی دی درخواست کیتی، افغانستان دی درخواست تے 48 گھنٹے دی عارضی جنگ بندی دا فیصلہ کیتے ، جے او اساݙیاں جائز شرطاں دے تحت ڳالھ مہاڑ کرتے معاملے طے کرݨ چاہندن تاں ایں کیتے تیار ہیسے، اے پیغام افغان حکام کوں ݙے ݙتا ڳئے، ہݨ بال انہاں دی کورٹ اچ اے جے واقعی او سنجیدہ ہن تاں ڳالھ اڳوں ودھاون۔ وزیراعظم آکھیا جو اساݙے دوست ملک خاص طور تے قطر معاملے کوں انتہائی سنجیدگی اتے خلوص نال طے کراوݨ دیاں کوششاں کریندے پئن، شرم الشیخ اچ جݙاں میݙی قطر دے امیر نال ملاقات تھئی تاں انہاں آکھیا جو پاکستان تے حملہ نہ تھیوݨا چاہیدا ہئی، اساں چاہندوں جو ایں معاملے کوں حل کراؤں اساں ایں اچ آپݨا کردار ادا کرݨ چاہندوں۔ وزیراعظم آکھیا جو افغان حکام توں وی اے آکھیے جو سانجھے مشورے اتے تعاون نال امن دی فضا قائم کرݨ چاہندوں ، اساں چاہندوں جو فتنہ الخوارج دا خاتمہ تھیوے اتے افغانستان دی سرزمین دہشت گرداں دے استعمال اچ نہ آوے اتے اے معاملہ دیرتئیں دیاں بنیاداں تے حل تھیوے۔ وزیراعظم آکھیا جو اساں شہیداں دی نماز جنازہ اچ شرکت کیتی، شہیداں دے لواحقین وی آکھیا جو دہشت گرداں دا خاتمہ ہووݨا چاہیدے۔ وزیراعظم آکھیا جو پاکستان اچ 2018ء اچ دہشت گردی دا مکمل خاتمہ تھی ڳیا ہئی، کیا وجہ اے جو ایں فتنے ول سِرچاتے، سابق حکومت ہزاراں دہشت گرداں کوں ول کُھلی چُھٹی ݙتی اتے انہاں کوں پاکستان اچ خوش آمدید آکھیا، اے دہشت گردی دے فتنے دے ول توں سِر چاوݨ دی بنیادی وجہ اے۔ وزیراعظم آکھیا جو افغانستان حکومت دی درخواست تے 48 گھنٹے کیتے جنگ بندی تھئی اے جے ویلھا گزاری کیتے اے کیتا ڳئے تاں ایں کوں اساں قبول نہ کریسوں۔ وزیراعظم آکھیا جو شرم الشیخ اچ غزہ اچ جنگ بندی کیتے معاہدہ تھی ڳئے، 74 ہزار نیاݨے، چھوہریں، ماواں بھیݨاں، ٻُڈھے اتے نوجوان شہید تھئن، غزہ دیاں نیاݨیاں کوں سکولاں ہسپتالاں اچ شہید کیتا ویندا پیا ہئی تاں انہاں کوں بچاوݨ آلا کوئی نہ ہئی، جنگ بندی کراوݨ اچ پاکستان اتے ݙوجھے ملک بھرپور کردار ادا کریندے پئن تاں ایں ویلھے اتھاں او لوک جیڑھے نی چاہندے جو امن قائم تھیوے او ایں دی آڑ اچ سیاست کرݨ چاہندن، غزہ جنگ بندی دے معاملے تے سیاست کرݨ کتھاں دا انصاف، کتھاں دا اصول اتے بھرپی اے، جݙاں نویں ڄمیے نیاݨے شہید تھیندے پئے ہن، غزہ دیاں ڳلیاں اتے محلیں اچ خون وہندا پیا ہئی، ہسپتالاں اتے سکولاں اچ انہاں کوں شہید کیتا ویندا پیا ہئی ایں ویلھے اے لوک کتھاں ہن اے ایں ویلھے جنگ بندی کروا گھندے جݙاں خون وہندا پیا ہئی ۔ وزیراعظم آکھیا جو غزہ اچ جنگ بندی دے بعد ہݨ خون ریزی بند تھی ڳئی اے، اے ٻہوں وݙی کامیابی اے، ایں اچ صدر ٹرمپ اتے سارے اسلامی ملکاں بھرپور کردار ادا کیتے خاص طور تے قطر، سعودی عرب، مصر، اردن، متحدہ عرب امارات اتے ترکیہ دا کردار ٻہوں اہم اے، معاہدے تے ترکیہ، مصر، قطر اتے امریکا دستخط کیتے پاکستان وی آپݨا فرض نبھایا۔ نیویارک اتے واشنگٹن اچ صدر ٹرمپ دے نال ملاقات تھئی، واشنگٹن اچ تھیوݨ آلی ملاقات اچ نائب وزیراعظم و وزیر خارجہ اتے فیلڈ مارشل سید عاصم منیر وی شریک ہن، شرم الشیخ اچ امن معاہدے تے غزہ اچ جشن منایا ڳیا لوک سڑکاں تے نِکلیے اتے سجدہ ریز تھئے لوکاں دی امید تھی ڳئی جو ہݨ امن قائم تھی ویسی، ݙو سال اچ غزہ اچ 74 ہزار لوک شہید تھئن ایں بربریت دی ایں دور اچ کوئی مثال نی مِلدی، اساکوں اللہ تعالیٰ دے حضور شکر ادا کرݨا چاہیدے جو اتھاں امن قائم تھئے، ہݨ اڳلے مرحلیں اچ پاکستان دا کردار اتے موقف ٻہوں واضح اے، فلسطین دی ریاست قائم تھیوݨی چاہیدی اے اتے اقوام متحدہ دیاں قرارداداں موجب فلسطینیاں کوں حق خود ارادیت ملݨا چاہیدے، اساں انہاں دے حق کیتے آواز چیندے رہسوں ۔ وزیراعظم آکھیا جو پاکستان کشمیری بھیݨ بھراواں کیتے وی ہمیشہ آواز چاتی اے اتے انشاءاللہ چیندا رہسی۔ وزیراعظم آکھیا جو آئی ایم ایف دے نال سٹاف لیول معاہدہ تھی ڳئے ایں تے پوری ٹیم دا شکریہ ادا کرݨ چاہندوں ہݨ پاکستان کوں قسط مل ویسی، اے ہݨ آئی ایم ایف دے نال آخری پروگرام ہووݨا چاہیدے، ویلھا آ ڳئے جو قرضیں توں جند چھڑاؤں پر اے سوکھا کَم کائنی، اوکھا مرحلہ اے ایں کیتے ݙینھ رات محنت کرݨی ہوسی ول ونڄ تے آپݨا ونڄا مقام گھن سڳسوں اتے پاکستان کوں صحیح معنے اچ قائد اعظم دے خواباں موجب ملک بݨا سڳسوں ایں کیتے محنت اتے مزید محنت پہلی شرط اے۔ وزیراعظم آکھیا جو پاکستان کوں معاشی طور تے تکڑا بݨاوݨا ہوسی جیویں معرکہ حق دے بعد پاکستان دا دنیا اچ وقار بُلند تھئے، پاکستان اقتصادی طور تے مستحکم تھیسی تاں ایں دی آواز اچ وزن ہوسی اتے دنیا تساکوں ݙیکھسی، پاکستان دے عوام نال اے وعدہ کریندوں جو اساں نہ تھکݨ آلی محنت کریسوں، میرٹ کوں یقینی بݨیسوں اتے پاکستان کوں ہک ایہو جیہا ملک بݨیسوں جیں دا خواب قائد ݙٹھا ہئی اتے جیں کیتے لکھاں لوکاں آپݨیاں جاناں دا نذرانہ پیش کیتا ہئی۔