سکیورٹی فورسز دی شمالی وزیرستان دے علاقہ دتہ خیل اچ کارروائی، 6 خوارج دوزخ واصل، چار ݙین٘ہہ اچ افغان طالبان دے بھیجے ڳئے 94 خوارج دوزخ واصل کیتے ڳئن

راولپنڈی۔17اکتوبر (اے پی پی) سکیورٹی فورسز شمالی وزیرستان دے علاقہ دتہ خیل اچ خفیہ اطلاعات دی بنیاد تے کارروائی دے دوران 6 خوارج دوزخ واصل کر ݙتے، چار ݙین٘ہہ اچ افغان طالبان دے بھیجے ڳئے 94 خوارج دوزخ واصل کیتے ڳئن۔ سکیورٹی ذرائع دے مطابق شمالی وزیرستان دے علاقے ٹنگ کلی (دتہ خیل) اچ سکیورٹی فورسز انٹیلی جنس بیسڈ آپریشن کیتا۔ سکیورٹی فورسز کوں آسپاس دے علاقیاں اچ دہشت گرداں دی نقل و حرکت دی خفیہ اطلاعات ملی ہن۔ فورسز اطلاعات دے پیش نظر 8 توں 10 ݙین٘ہہ تئیں علاقے دی بھرپور نگرانی کیتی، 16 اکتوبر کوں سکیورٹی فورسز انہاں دہشت گرداں کوں گھیرے اچ گھن گھدا، فائرنگ دے تبادلے اچ 6 دہشت گرد دوزخ واصل جݙاں جو 3 زخمی تھی ڳئے۔ سکیورٹی ذرائع دے مطابق ہلاک تھیوݨ آلے دہشت گرداں اچ فتنہ الخوارج دا کمانڈر محبوب عرف محمد وی شامل اے۔ سکیورٹی فورسز دی اے کارروائی علاقے اچ امن دشمن عناصراں دے خلاف جاری آپریشن دا حصہ اے، عوام اتے سکیورٹی فورسز ملک توں دہشت گردی دے ناسور کوں مُنڈھ توں پُٹݨ کیتے پرعزم ہن۔ سکیورٹی ذرائع دے مطابق گزریل چار ݙین٘ہہ اچ افغان طالبان دے بھیجے ڳئے 94 خوارج دوزخ واصل کیتے ڳئن۔ نیشنل ایکشن پلان دے تحت عوام اتے سکیورٹی فورسز ولوں دہشت گرداں دے خلاف بلا امتیاز اتے مسلسل کارروائیاں جاری ہن۔